Matxingorri Gazte Konpartsa
Lehertu du txupinak beste urte batez Deustun eta gazte independentistok buru belarri izan gara jai herrikoi hauen bueltan. Argi dugu, soilik ongi antolaturiko herriak lor ditzake jai handiak. Eta gurean erakuslehio ederra da martxoan herri hau loratzeko dagoen gaitasuna.
Eguneko egitarau ederraz gozatu dugu Done Petri plazan, izan ere, egitarau oparoa izan da ekintza desberdinez josia. Gauerdian, dantzan zein kantuan ibili gara eta topa egin dugu Matxingorriko txosnan. “Askatasunak badauka herri honetan Txosna bat” izan da gure aurtengo leloa.
Deustu eta Euskal Herri aske bat irabaztera goazen gazte ameslariok Matxingorri Gazte Konpartsa dugu elkargune. Aisialdia eta jai herrikoiak balio eraldatzailez bizi eta aldarrikatzen ibili gara.
Arranopola
Astelehena da, Deustuko Jaiak bukatu ziren atzo, eta errutinaren morroi bilakatu naiz berriro: garbigailua jarri, harrikoa egin, etxea txukundu, lanera itzuli… Ingurukoek pentsatu dute astelehen arrunta dela niretzako, baina oraindik ez didate ahots urratua igarri, ez dute ikusi esekitokian zintzilik daukadan sudadera morea, harraskan dudan plastikozko edalontzi-pila. Irribarrea ezkutatu ezinik nabil Arranopolarekin jaietan zehar izan ditudan momentuak gogora ekartzean: txosnaguneko dantzak, bazkarietako elkarrizketak, herriko tabernako kantuak, playbackeko barreak, txanda bakoitzeko anekdotak…
Egia esan, ederra da, errutinaren morroi bilakatzea nahi gaituzten mundu gris honetan, egoteko eta egiteko beste modu bat eskaintzen dizun konpartsa bat izatea. Ederra bezain ezinbestekoa da, errutinaren morroi ez bilakatzeko, mundu aldrebes honi hozka egin nahi dion konpartsa bat izatea, zeren eta jaietatik ere, herri aske bat eraikitzen dugu egunez egun: euskaraz eginez, belaunaldiarteko harremanak sustatuz, jai feminista eta ezkertiarrak bultzatuz, kanta eta dantza eginez, independentzia aldarrikatuz, presoak jaietan nahi ditugula gogoratuz, den-denok kabituko garen espazioak asmatuz, herri mugimendutik antolatuz… Gora Deustuko jai ezkertiar, feminista eta euskaldunak!
Pare Deustuko Gazte Talde Feminista
Ostiraleko 20.00ak ziren eta Deustualdeko Gazte Feministak prest geunden pregoia entzun, txupina bota eta jaiei hasiera emateko. Bajadarekin batera eta nahi baino ohikoagoa den euriaz buztitako jai giroaz ekin genien jaiei, eta Botikazar parkera heldu bezain pronto ireki genuen txosna feminista. Bertan, ispilu handi bat eta “Denok izan gara erasotuak baina inork ez du lagun erasotzailerik, KONTUEK EZ DUTE EMATEN!” leloa gainean idatzita. Kañak jartzen hasi eta berehala, gazte feministok txosnagunean gure lekua hartu eta kontzertuko lehen lerroa gureganatu genuen. Dantza eta aldarrikapena izan ziren nagusi lehen gau horretan.
Jaietan zehar hainbat eta hainbat izan dira gozatu ditugun ekintzak: Munduko Arrozak txapelketa gastronomikoa, Olatz Salvadorren kontzertua, Emakumeen aurreskua, gaueko irrintzi lehiaketa edota playbacka, besteak beste.
Aprobetxatu nahi dugu gurekin batera jaietan gozatu, laguntza eskaini eta zaindu gaituzuen guztiei eskerrak emateko, baita gure txosnara hurbildu eta Bingo Feministan parte hartu zein PARE PEC txupitoa hartu duzuenoi edo beste gabe, jai feministak aldarrikatzen jarraitzen duzuenoi.
Gora Deustuko jai herrikoi, parekide eta parte hartzaileak! Eta... que el ritmo no PARE!
Deustuko Jai Batzordea
Programak diseinatu, komertzioetatik pasatu, azpie gitura kontratatu. Kartelak pegatu, txosnak muntatu, egitaraua lotu. Udaletxea eraiki, txandak banatu, banderatxoak eskegi. Deustuko jaiak antolatzeak hilabeteetako lana dakar. Ez da erreza jakitea formatu bat ala beste egokiagoa izango den, ordutegi hau edo beste aproposagoa izango den… Baina erabakiak hartu behar dira, eta iritziak iritzi, aurrera goaz jai batzordeko mahaia osatzen dugun 20tik gorako kideok. Eta aurten, zalantzarik gabe, asmatu egin dugu.
Agian, eguraldiak ez du asteburuak aukeratzen asmatu eta, hala ere, txapelketa gastronomikoetan plaza lepo egon da. Bai haur bai helduen play-backean parte Deustuko Jai Batzordea hartze kopurua eta showen maila izugarri igo da. Euskal dantzek ez dute etenik izan. Txikienak ibili dira pailazo, mago eta ginkana artean. Gozatu dugu kontzertu bakoitzeko. Frontoia estadio bilakatu da eskupilotako eta saskibaloiko finalak animatzen. Ikusi ditugu milaka zapi gorri jantzita, aurrera eta atzera. Elkartu gara aurten ere kuadrilletan, eta aiiiii kuadrillak, a zer nolako giroa ematen diezuen 10 egun hauei.
Eskerrik asko deustuar guztioi egin duzuen txanda, ekarpen, plater eta dantza bakoitzeko. Jai Batzordeko kideok inoiz baino indartsuago heltzen diegu aurten balorazioari eta hurrengo egitasmoak antolatzeari. Gora Deustuko Jaiak!
Gazte Alai aisialdi taldea
Ene Deustu, oraindik aje emozionalarekin jarraitzen dugu eta jaietan erabili dugun arropa guztia lehortzen dabil oraindik ere, txaparrada etengabea bizi izan dugulako. Hala ere, jaiak asko disfrutatu ditugu eta gehiago bizitzeko gogoz geratu gara.
Bestalde, gogotsu parte hartu dugu Deustuko Jai Batzordeak antolatutako ekintza eta jarduera guztietan. Hala nola, asteburuetako gastronomia txapelketetan egon gara -munduko arrozak, tomatada eta tortillak-, baita astean zehar egondako herri kiroletan eta bertso saioan ere. Horrez gain, igandeetako eskupilota eta saski txapelketak ere asko disfrutatu ditugu.
Orain jaiei pena handiarekin eman diegu agurra, baina hurrengo urterako prest gaude, oso gogotsu. Gora Gazte Alai Aisialde Taldea!
Berbaizu Euskara Elkartea
Aurten ere argi utzi dugu euriak ezin gaituela gelditu, are gehiago, indartu egiten gaitu. Gorputzak askatuta eta lotsak baztertuta, euripean dantzan hasi genituen jaiak. Jaitsieran, Txantxiku aisialdi taldeko kideok putzuetan jauzika iritsi ginen txosnagunera.
Izan ere, oihanean murgilduta gozatu dugu abentura hau, natura bete-betean gure elkarzale bihurtu baitugu. Oihanean gu geu izan gara eta erakutsi dugu kosta ahala kosta gure mundu polit txiki honetan posible dugula euskara hutsean bizitzea. Jarrai dezagun oihanean murgiltzen eta jaiez gozatzen Berbaizu eta Txantxikurekin. Gora Deustuko jai herrikoi eta euskaldunak!
Deustuko Gazte Lokala
Martxoaren 14tik 24ra, Gazte Lokalak Deustuko Jaietan aktiboki parte hartu dugu: txosna jarri, Munduko Arrozak gastronomikoan parte hartu eta beste hainbat ekintzatan lagundu dugu. Horrez gain, Gazte Lokalean egitarau propioa antolatu dugu, gazteen (eta ez hain gazteen) grinari esker.
Lehen asteburuan, GKS eragileak jaialdi bat antolatu zuen barikuan. Zapatuan, Samalda Da! egun berezia ospatu genuen: eguerditik gauera arte, Gazte Lokala elkargune bilakatu zen. Bazkarian indarrak hartu, sortu berri den ‘Nuen Maite’ irratiaren lehen saioa aireratu, eta iluntzean, musika eta festa auzora zabaldu genituen, Zaunka, Calzados Deportivo, Nebula Selektah eta Aitor (Müll) artisten erritmo eta estilo anitzekin.
Bigarren asteburuan ere Deustuko merkatu zaharrak bizirik jarraitzen duela erakutsi izan genuen. Barikuan, urteroko Bertsio Gauak jendearen gogoa eta kanturako grina piztu zituen, eta zapatuan, Patiren Lagunek elkartasun jaialdia antolatu zuten, non jaiei amaiera eman zitzaien.