Deustun ireki berri duzue, baina benetan, noiz sortu zen La Puerta Tattoo?
Sonia: La Puerta Tattook hainbat urte daramatza prozesuan. Deustun inaugurazioa egin aurretik Abandon zegoen estudioa eta pribatua zen.
Sandra: Urte eta erdi inguru generaman, eta ideia hasiera batean berdin jarraitzea zen, estudio pribatua izaten. Hala ere, udalak eskatuta eta hirigintza kontuengatik aldatu behar izan genuen. Izan ere, aldaketa nahiko azkarra eta erraza izan zen. Estudioa pribatua izatetik kaleko estudio. izatera egokitzeko ez dugu inolako arazorik izan. Uste dut hala izan dela proiektuko kideok aurretiazko esperientzia dugulako.
Gaur egun zenbat langile zarete estudioan eta nola antolatzen zarete?
Sonia: Oraintxe bertan estudioan sei gaude. Lau tatuatzaile egoiliarrak dira: Sandra, Ivan eta Pepe, estudioaren jabe direnak, eta Bitxor. Eta azkenik Jon, orain gurekin praktikak egiten ari den mutila.
Sandra: Horiez gain, hilean behin Tam etortzen da. Orain Xixonen bizi da eta noizean behin bisitan etortzen da. Estudioko langileez gain, gonbidatuekin ere ibiltzen gara lanean. Azkenean, sei tatuatzailerentzat lekua dugunez, lagunak edo proiektu interesgarriak dituzten artistak gonbidatzen ditugu.
Sonia: Normalean hilabete bakoitzeko gonbidatu bat izaten dugu gurekin.
Zergatik erabaki zenuten lokala Deustun irekitzea?
Sandra: Ivanen kontua izan zen. Lehen aipatu dudan moduan, aurretik Abandoko pisu batean geunden eta egun batetik bestera estudioa izateko baimena ukatu ziguten. Hirigintzari dagokionez, tatuaje-estudioak ile-apainketaren eta estetikaren epigrafean sartzen dira eta araudiak dionez hauek, kalean bertan egon behar dira. Hala, Ivanek Deustuko lokala alokatzeko iragarkia jartzen ari zirela ikusi zuen eta seinale moduko bat zela sentitu zuen.
Sonia: Esan zidan lokalaren tamaina ikustean jakin zuela ezin hobea zela berak zeukan ideiarako. Nik uste lokala bera baino, metroa aurrez aurre izatea gustatu zitzaiola gehien, ikusgarritasun handia ematen duelako. Dendaren aurrean gelditu ahal izatea eta lokal barruko jende trafikoa ikustea abantaila ere bada.
Nolakoa izan da auzoaren partetik harrera eta ze inpresio ematen dizue Deustuk?
Sonia: Egia esan, harrera oso ona izaten ari da. Batez ere auzoko jendea oso jatorra da. Asko hurbildu zaizkigu galdetzera eta hori eskertzekoa da. Kalean ikusten dugun jende trafikoa estudiora ekartzea asko interesatzen zaigu.
Sandra: Hurbileko saltokietatik ere etorri zaizkigu. Lanera joatean edo bertatik bueltatzen direnean, haien burua aurkezteko gelditzen dira, eta asko eskertzen dugu. Inguruko denden zein auzoko bizilagunen harrera oso ona izan da eta oso pozik gaude.
Gainera, beste saltokietatik etortzen zaizkigun moduan, gu ere beste saltokietara joaten gara gure burua aurkeztera eta horrela, tokiko merkataritzari laguntzen saiatzera. Momentuz ezin dugu trabarik jarri. Alderdi horretan oso babestuak sentitu gara.
Abandorekin alderatuta, ezberdintasunak sumatzen dituzue? Bidenabar, Deustu erakargarria da zuentzat?
Sandra: Noski. Azkenean, Abando ondoan genituen autobus guztiak, aireporturako konexioak, Bilbo Handiaren inguru osora eramaten zaituen metroa... Orduan, bertan jende gehiago elkartzen da; Deustu aldiz, auzo familiarragoa da. Jendeak inguruan egiten du bizitza eta edonora joateko garraioak dauden arren, ez dauka Abando inguruarekin antzekotasunik.
Sonia: Bai, hurbilagoa iruditzen zait. Niri, gainera, asko gustatzen zait, eta beti gustatu izan zait inguruko jendea ezagutu ahal izatea; taberna batera joatea eta zerbitzariak zuzenean zer eskatuko duzun jakitea alegia. Halako gertutasuna gustatzen zait eta auzoak hori eskaintzen digu.
Garrantzitsua iruditzen zaizue bezeroarekiko tratu hurbila izatea?
Sandra: Nire ustez, funtsezkoa da. Nik, adibidez, batez ere jendearen lehen tatuajeak egin ohi ditut eta bezeroei beti gauza bera esaten diet: atetik sartu zarenetik, munduko lagunik onenak gara. Pentsatzen dugun guztia esan diezaiokegu elkarri, eta konfiantza osoz. Beraz, erakutsitako diseinua ez badu gustuko, esan diezadala. Milimetro bat mugitzea nahi badu, esan diezadala. Agian, argudiatu beharko diot zergatik berak dion lekuan ez litzatekeen hain ondo geratuko, baina jakin behar duen guztia esango diot.
Nire ustez, ordu erdiko lana bada ere, bezeroarekin lotura txiki bat sortzea ezinbestekoa da lana ahalik eta oberen egin ahal izateko. Tratuak pertsonalizatua izan behar du, bezeroa gustura egoteko eta etxean bezala sentitzeko. Azkenean, giro lasaia sortu nahi dugu, jendea gustura egotera etor dadin.
Oztoporik edo arazorik izan duzue lokala irekitzerakoan?
Sonia: Egia esanda, ez. Aurretik existitzen ginenez, hutsetik hasi eta estudio bat irekitzea baino askoz errazagoa izan da. Gainera, prozesua nahiko azkarra izan da. Obrak irailean hasi ziren eta urriaren amaierarako ia dena prest zegoen.
Lokal honetako dekorazioa guztiz berria da edo aurreko estudiokoa ekarri duzue Deustura?
Sandra: Lokal osoa berritu dugu. Niri pertsonalki, pena handia eman zidan lokalez aldatzeak, bizitza osorako izango nukeen etxe ideala izan litekeelako estudio hura. Hala ere, berri onetan, aurreko lokalaren esentzia mantentzen saiatu gara. Adibidez, marmolezko pareta polit bat zegoen argazkiak ateratzeko; orain hemen marmolezko xafla batzuk jarri ditugu komunean. Horrelako gauzatxoak egin ditugu, lokal berriak lehengoarekin zerikusia izateko.
Sonia: Ahal izan duguna ekarri dugu eta hemendik aurrera gure estiloa bilatuz joango gara.
Pentsatu al duzue auzoko ekitaldi edo jardueretan parte hartzea? Hau da, estudioa Deustuko komunitatearekin gehiago lotuko duen proiektu berriak egongo dira?
Sonia: Bai, baina oraindik prozesuan gaude. Nire ustez, estudioko kideok auzoko ekintzetan parte hartzeko ideia dugu, ezagut gaitzaten. Gutxi barru Deustuko jaiak dira eta moduren batean edo bestean parte hartzea gustatuko litzaiguke. Etorkizunera begira ere, baditugu ideia politak esku-artean; bezeroei zuzendutako tailerrak egitea gustatuko litzaiguke.
Momentu honetan ez daukagu proiektu zehatzik baina Deustuko auzokideei beherapenak egiten ari gara tatuajeetan. Bizilagunengana gehiago hurbildu ahal izateko horrelako gauza txikiak egitea gustatzen zaigu.