Bihar, azaroaren 27an, Igogailua antzezlanaren aurrestreinaldia izango da Deustuko La Fundición aretoan, eta emanaldia euskaraz eskainiko da. Ikuskizuna 19:00etan hasiko da, eta 14 euroko sarrerak dagoeneko eskuragarri daude aretoaren webgunean: https://www.lafundicion.org
Proiektuaren ekoizpena Fábrica de Brujas kolektiboarena da, arte eszenikoetan ibilbide luzea duten profesionalek osatutako konpainia berriarena:haien arabera, antzerkia esperientzia bizi, emozional eta eraldatzailetzat ulertzen dute.
Antzezlana esperientzia erreal batean oinarritzen da: bizitza bat kolokan jartzen duen gaixotasun baten diagnostikoan. Istorioak protagonista igogailu batean harrapatuta geratzen den unetik abiatzen da, baina espazio horrek ez du errealitate fisiko soil bat irudikatzen, baizik eta inkontzientearen geruzetan barrena egindako bidaia existentzial bat. Proposamenak poesia bisuala, antzerki fisikoa eta musika hipnotikoa uztartzen ditu, ikuslea esperientzia sentsorial eta emozional batean murgilduz.
Antzezlanak 81 minutuko iraupena du, eta tragikomedia garaikide gisa aurkezten da, errealismoaren eta ametsaren arteko mugan. Arantza López da lanaren dramaturgo eta zuzendaria, eta antzezleak Itziar Fragua, Leire Ormazabal eta Aiora Sedano dira. Oholtza gaineko sorkuntza osatzen dute Tomás Ezquerrak (argiztapena), Ainhoa Areitiok (jantziak) eta Rubén G. Mateosek (musika ekoizpena).