Laguntza eskaturik
San Antoniori
bertsoak jartzera noa
bertso- eskolari
“Potojorran” deritzo
eta bertan ari…
zazpi ipotx zozo (e)ta
ni Edurne Zuri.
Ostegunero igoaz
kantuan gurdira
ipotxak eraman behar
nor bere aulkira
baberoak jantzi (e)ta
papillari tira
eskolako txikiak
lakoxeak dira!
Afal ostean hasten da
kopletan biajea
bakoitzak erakutsiz
dakarren ajea;
nire burua(r)i diotsat
“aupa, korajea”
Ikus(i)ko bazenute
hauen pelajea!
Batak intziri eta
besteak garrasi
erdi gorrak direla
ematen du kasi
“Maritxu” (e)ta “Habanera”
bi doinuak nahasi…
berdin zaie, sol, fa, re,
berdin la eta si.
Iñaki´ren tabernan
ostegun iluntzi
guztietan biltzen gara
eta ez da gutxi,
bertso sorta hontan zehar
egia nagusi
ez baduzu sinesten
zatoz ta ikusi!