Franko hil eta, hurrengo urtean
martxoak zituen hiru
Jaun Herioren gerla txakurrek
Gasteiz hartu eben gatibu
Euskal Herria, nazio artea
inpotentzian testigu.
Denbora luzez, borroka latzez
langileek zioten eutsi
eredugarri zen batasunez
bazter denak inarrausi
han ez zegoen sindikaturik
Asanblada zen nagusi.
Inperioko jauntxo hoientzat
egoera zen insano
ahaztuezina behar zen zigorra
planeatzen mano- mano
Fraga Iribarne, Martin Villa ta
jenerala zen Campano.
Harro ozenki esaten zuten
"bukatu da frankismoa"
baina zein garbi ikusi gendun
betiko hauen asmoa:
<demokrazia> lege bihurtzen
estatu terrorismoa!
Loretzen hasi ziren kimuak
behar zirenez idortu,
etorkizuna eta ametsak
behar zirenez zigortu
gupida gabe, balaz josirik
utzi zituzten bost gorpu.
Armadakoen arrazoi ezak
beti dakar malerusa
gerla jauntxoek hedatu zuten
izua ta zukurutza...
bost hildako ta ehunka zauritu
triskantza, polbora-hautsa!
Kriminal haien oinordekoek
sorturik hainbat enredo
bestelakotu egin gaituzte,
bihurtu euren bezero...
hiltzaile zaharrak eredu dira
eta biktimak borrero.