Doinua: Anai-arrebak hementxe nator
Irrati lanak egitekotan
fitxaje urnietarra,
“Bilbo Hiria irratia”ren
“Potto-arduradun” bakarra
Baina bezperan busti egin zen
jantzi ez arren txamarra:
entzule bertso zalea dugu
pena damaigun bakarra.
Kafe Antzokiak bete berriak
ditu egun hogei urte,
gisa hortako esatariek
lagunduta… ez dut uste.
Baietzak eta hitzak sarritan
eman ta jaten dituzte:
hauek ganora duten aldiko
euskal kostan lau elurte.
Hitzontzi hutsa bihurtzen baita
izan nahian esatari,
Carlton hotela bihur lezake
ri-rau Belengo atari.
Oihuka berdin ekingo dizu
edo bertso txar kantari,
zotz eskasokin ezin lan egin
nahiz izan errementari.
Bilbo Hiriak entzulegoa
du zintzoa ta fidela,
bere programa, egutegia,
eten ez dadin kordela.
Esataria da absentista
ta merezi du kartzela,
ofiziorako ez du balio
ta han saiatu daitela.