Doinua: Haizea dator iparraldetik
Bidasoako Bera herrian
genuen jarria zita
Bortzirietako eskolen lehiak
merezi zuen bixita
‘Bertsotruk’ leloz zen ekimena
aitzakiatzat jarrita
‘Potojorran’ek bidali zuen
ordezkaritza polita
antolaketa eta eguna
zetozen galaz jantzita
ta gutxiago ezin ba izan
bertsotarako irrika
eta langintzan hogeitapiku
norgehiagokan zer kinka
gure ‘Abarkas’ ondo aritu zen
gainontzekoak ezinka.
Berako ‘Xugan’ tabernak hartu
zuen lehen final-laurdena
hots 3 G-ak finalerditik
kanpo utzi gintuena
gauza berbera Mungitar ixko
biei pasa zitzaiena
begibistan zen -onartu txantxa-
tongo-aperitifa zena
bazkari ederrak berdindu zigun
mikro aurreko errena
gero kafeaz Lesakaraino
Bidasoatik barrena
finalerako 6 txartel zeuden
taldeka lehian hurrena
giro goxoan bertsoz girotu
zuten ‘Zialdo’ taberna.
‘Zialdo’ ziaro berotu eta
‘Haizegoa’ra joateko
hego haizeak hartu gintuen
trago luzeen menpeko
‘Abarkas’ jada finalista zen
postre-tongoa tarteko
norbaiek zion “bazun garaia
final batean sartzeko”
final erdien bigarrengoa
ere joan zen antzeko
ta honenbestez final haundia
zerrendatu zen konpleto
ta ez geundenez trago-luzeen
martxa asko luzatzeko
‘Arrano’raino joan ginen sabel
ta mingainak dantzatzeko
Eguerdiz Beran eman ziguten
doan ta txukun bazkaltzen
orain ‘Arranon’ are hobeto
kategorian afaltzen
postre garaian 6 finalistak
hasiaz oholtzaratzen
“ Ze hirukote gailenduko da?”
galdera hasi zen gailentzen
Etxabe,Abarkas, ta Zelaieta
hasi ziren nabarmentzen
ateraldiak ta habanerak
‘Abarkas’ puntuak batzen
ah! agurrean poto egin zuen
nahiz ta nahigabe izan zen
biba! ze ez da ‘Potojorran’en
‘potogabe’rik onartzen
Ta horrenbestez berediktoa
‘Dalton anaien’ kartela
‘Abarkas’ eta bere kideak
txapela bana zutela
‘Kotto-Saria’, bertso onena
Xabi Maiaren itzela
“lehia” bukatu eta piztu zen
parrandarako kandela
ta ni testigu goizalderaino
bertso-goserik bazela
laburbilduaz hartu gintuzten
goxo etxeko bezela
guztia bikain antolatua
uste dut esan leikela
Bortzirietako Bertso Eskolak
merezi zula txapela.