Lehengo egunean Josebak esan
eban gauza bat apropos
gizakia ta matematika
ez datozela bat inoz
irakurrita musturra oker
imini neban nik gogoz
ta bertso batzuk imingo dodaz
ez nagoalako ados.
Gure Jainkoak ez eban egin
ateoa nazalako
Baina asmatu ebanak hartu
ebazan neurriak bapo
halabeharrez ala derrigor
ez gara edozelako
Vitrubio zaharrak marrazki baten
erakutsita edarto.
Esaterako hatz nagusia
hartu ezkero aukera
eukuinekotik ala ezkerretik
neurtuta goitik behera
zenbaki zehatz bat aterako
da horrexen arabera
ta neurri hori hain zuzen be da
morroiaren altuera.
Eskuarekin jarraitzekotan
fijatu behar da hara
ze neurri dekon eta zelanik
kointzidentziak atara
zentimetrotan ala xemetan
neurtu nahi dozun erara
ta bider hamar egin ezkero
barriro altuera da.
Ta eskuagaz segiko dogu
neurtzen dana jo ta su
la hatzamarrez egiten dozu
beherantza jo ezkero aizu
baina gorantza abiatuta
besaurrea hor jatortzu
ta esku ahurra sei aldiz egin
ta besaurrea daukazu.
Erakutsita nire ideia
emanda daturik frango
honen kontrako tesia eitea
ez da erreza izango
gorputz atalak gehiago dira
bular, sabel eta zango
askoz gehiago dagoz aukeran
baina nik ez dodaz eingo.
Guti Errez