Udabarri hastean
Iretargi bete,
Zer barrizten dabilen
Behatu leiteke:
Negua joan jaku
Edurretan merke,
Otsaileko eguzkia
Indarrez potente,
Klima berotu dala
Nork ez dakusa ete?
2)
Beroaldi horretan
Politika lohia:
Munduan hazten doa
Muturreko eskoia,
Alkar harturik dabil
Jotze aldera goia,
Barkatu ekartzea
Betiko sermoia:
Besteok batu gaitezan
Ez al da sasoia?
3)
Politikaz ganera
Gure euskal printzan,
Ez dogu amore emoten
Euskaldun baldintzan:
Zelan herririk herri
txertatzen gabiltzan,
Hizkuntzaren hazia
Neguko penditzan,
Udabarriz loratzen
Gara euskalgintzan:
4)
Urkiola, Altube
Izpegi, Belate,
Korrika barriz dator
Euskera estandarte,
Mila aldarrikapen,
Lana, borondate,
Altsasura heltzean
Eskatu behar jake,
Geldi lotu daitela
Zeozer mugitu arte.
5)
Bertso ikuspegia
Adituta alboz,
Bizkaian para dira
Hirukoteak ados,
Sotok jada bost txapel
Nafarroako ardoz,
Arabako finala
Martiko akaboz,
Eta Gipuzkoan bere
Abiatzear dagoz.
6)
Ta uda bitartean
Hiru hil edo bi,
Haize goxoa opesten
Dotsuet danori!
Segi daigun egiten
Txarto edo ongi,
Bihotz ta garunaren
Artean dan hori,
Ta bertso apologia
Mauri ta Apolori.
LUKI MANTXU