Joseba Sarrionandia: "Komunidade moduan bere burua antolatzen jakin ez dauen herri bat gara"

Kubatik itzuli zanetik, hainbat hilabete pasau ostean, egonkortzen dabilela azaldu deusku idazle iurretarrak. Azkenaldion aurkezpenak, berbaldiak eta errezitaldiak tartekatzen dabil. Euskal Herriko plazetara itzultzea apur bat arraro baina aldi berean polita dala esan deusku, oso ondo sentiduten dabilela nabarmenduta.

Bilboko Liburu Azokan Joseba Sarrionandiak “Mundiari bira eman zion ontzia” liburua aurkeztu dau gaur. Elkanoren urtean, bidaiaren kontakizuna egiten dau liburuan Sarrionandiak, amama baten eta ilobearen arteko alkarrizketearen bidez. Historia ezagutzeko ahalegin bat egin dauela esan deusku Sarrionandiak.

Aurten Elkanoren bidaiaren bosgarren mendeurrena beteten dala eta, hainbat ospakizun eta jai izango dira. Pertsonaia historikoak sinbolo bihurtzen dira Sarrionandiaren eritxian, eta garrantzitsua gertau zana jakitea dala.

Durangaldean testuak euskeraz idatzi dabezanen ikerketa historikoa be egiten dabil Sarrionandia eta ikerketa hori zelan egiten dabilen azaldu deusku.