Joan dan seihilekoan Plateruenaren inguruko gogoetan ibili dira Durangaldeko alkarte, sortzaile eta kulturzaleak, EHUko Parte Hartuz ikertaldeak gidatuta. Zilarberritzen izeneko prozesu parte-hartzaile honetatik sei lerro estrategiko ondorioztatu ditue:
1) Proiektuaren transmisinoa:
Proiektuaren etenbako transmisinoa ezinbestekoa da, jendarteak Plateruena hur eta bere sentiduteko. Horretarako proiektua konpartidu eta, Plateruena zer dan, zelan sortu zan eta zein helburu dituan transmitidu behar da.
2) Alkargunea: alkarteentzako, sortzaileentzako, sortzaile emakumeentzako:
Plateruenak alkargune zeregina hartu beharko leukela uste da bai alkarteen artean, zein sortzaileen artean eta zelan ez emakume sortzaileen artean.
3) Emakumeen presentzia:
Ikuspegi feministea antzokiaren jarduera guztietan eta egunerokotasunean txertatzea beharrezkoa da. Gizarte ereduaren arazo moduan identifiketan dan arren Plateruenaren inplikazinoa eskatzen da horri aurre egiteko.
4) Komunikazino bideak ugaritzea:
Prozesu osoan komunikazinoa sakonago landu beharra sarri aitatu da. Proposamen legez puntu bi nabarmendu daitekez: batetik gardentasunaren garrantzia, eta bestetik komunikazino personalizatua egiteko beharra. Horregaz lotuta, komunikazino estrategiak interakzinorako bidea zabaldu beharko leukela nabarmendu da, joan eta etorriko komunikazinoa lortze aldera.
5) Askotariko diziplinak barruratzea:
Musikeak programazinoa monopolizetan dauela aitatzen da. Beste kultur diziplina batzuk barruratu beharra dago.
6) Sortzaileentzako babes eta sustapen gunea izatea:
Plateruena kulturgintzarako gunea izanik sortzaileakazko laguntza hartu-emonak izan beharko leukezala ikusi da. Horreekaz alkarlanean ibilita, espazioa eskainiz eta euren intereserako ekimenak antolatuz.
Kontuak kontu, proposamen horreek guztiak aurrera eroan ahal izateko oinarrizko aldaketa bi proponidu dira: kudeaketa eredua aldatzea eta eraikinaren espazioa egokitzea espazio barriak sortzeko.
Oraindik aurrera, Plateruenako gestinoa parte-hartzean oinarrituko da. Lan-taldeak sortuko ditue kultur sortzaileek, herriko alkarteek eta proiektuagaz bat egiten daben herritarrek berbea izan deien.
Hiru lan talde:
- Erakustekoak: Kultur programazinoa lantzeko taldea. Eragileek, udalak eta bestelakoek antolatzen daben eskaintzaren arabera koordinau beharko da.
- Sorkuntzea: Sortzaileen beharrizan eta proposamenen arabera kudeatuko dan taldea. Sortzaileen arteko sare finkoa eregitea izango da helburuetako bat.
- Komunikazioa: Proiektuaren transmisinoaz arduratuko da. Herritarrakaz eta alkarteakaz hartu-emonak landuko ditu, eta egitasmoen barri emongo dau.