Buruko isuri baten ondorioz hil da Lauren Bacall aktore estadubatuarra, New Yorken. Berrogei bat pelikulatan parte hartu eban, eta antzerkian be lan ugari egindakoa zan. Broadwayn igon zan lehenengoz eszenatoki batera, 1942an.
Betty Joan Perske izenagaz jaio zan 1924an, New Yorkeko Bronx auzoan. Gurasoak etorkin judu poloniar eta errumaniarrak ziran. 1944an egin eban lehenengo pelikulea, To have and have not, Howard Hawksen zuzendaritzapean, eta senarra izango eban Humphrey Bogart ezagunagaz batera. Hainbat lan egin zituan Bogartegaz, besteak beste, The Big Sleep (1946), Dark Passage (1947) eta Key Largo (1948). Marilyn Monroe eta Betty Grablegaz batera How to Marry a Millionaire komedian parte hartu eban 1953an.
Azkenengo urteetan film batzuetan parte hartu eban, Dogville, Manderlay, Diamonds eta abar. Zinemea baino antzerkia gurago eban, Tony sari bi irabazi zituan, bata Applause lanagaitik, eta bestea, The Woman of the Year beharragaitik. 1992an Donostia Saria jaso eban, eta 2009an Ohorezko Oscarra. Oscarretarako hautagai izan zan 1996an, Barbra Streisandek zuzendutako The Mirror Has Two Faces (1996) pelikuleagaitik.