Kontseiluak estadaduen esku-hartzea salatu eta zezeilaren 28rako deialdia egin dau
Euskerearen Gizarte Erakundeen Kontseiluak agerraldia egin eban eban atzo Donostian. Espania eta Frantziako gobernuen jarrerea salatu eben, eta gero eta modu agiriagoan jazoten dabilzan kanpo esku-hartzeen aurrean jarrera sendoa hartu daben administrazinoetako arduradunen jarrerea txalotu bere bai. Kontseilua osotzen daben erakundeetako hainbat ordezkari izan ziran prentsaurrekoan, besteak beste, Koldo Tellitu (Ikasyolen ELkartea), Nestor Esteban (Euskal Herrian Euskaraz), Karmele Artetxe (Udako Euskal Unibersidadea) eta Maren Belastegi (Uema).
Estaduek euskerearen normalizazinoan eta hizkuntza-politiketan izan daben esku-hartzea ez da barria. Kontua da azkenaldian aspaldiko modurik agarikoenean dabilzala estadu biak, inolako mozorro barik, azaldu eban Kontseiluko buru Paul Bilbaok. Frantziako Gobernuko ordezkari Patrick Dallennesek eta Espainiako Gobernuak EAEn dauen ordezkari Carlos Urkijok hartutako erabagiak izan zituan berbagai. Nafarroan jazotakoak be gogoan izan zituan, izan be, Baztanen ordenantzei helegitea ipini deutso Nafarroako Gobernuak.
Gipuzkoako Foru Aldundiaren euskera plana eta Uemako hamabost udale aktak euskeraz bialdu izana salatu ditu Urkijok, eta helegitea ipini dau. Eta Dallennesek Uztaritzeko Herriko Etxeak euskara ofizial izentau izana auzitara eroan dau. Orain dala hiru egun Paueko Administrazino Auzitegiak atzera bota dau Uztaritzeko Herriko Etxeak euskerea ofizial izentatzeko erabagia.
Bilbaok adierazo ebanez, euskereari balio juridiko osoa kendu nahi jako, izan be euskereagaz batera beti gaztelania edo frantsesa agertzera derrigortu nahi dabe, euskereari apaingarri estatusa bakarrik autortuz. Honetan guztian erantzule bat baino gehiago dagoala uste dau. Erantzukizunak partekatuak dira. Arduradun politiko bakotxak dauka bere ardurea arlo honetan. Halanda ze, alderdi eta erakundeetako arduradunekaz harremanetan ipiniko da Kontseilua, jagokien ardurea eskatu eta erantzun bateratua emoteko deialdia eginez.
Kontseiluko zuzendaritzeak helegiteak jaso dituen udaletako arduradunak eta Gipuzkoako Foru Aldundiko arduradunak oztopoen ganetik aurrera egiteko adierazo daben asmoa txalotu dau. Umeako udalek aktak euskeraz bialtzen segiduko dabela jakinarazo dabe.
Agerraldiaren amaieran, herritarrei be deia egin eutsien, zezeilaren 28an egingo dan deialdian parte har deien. Laster erabagiko dau Kontseiluak ze muetatako erantzuna emon, baina argi esan eban Bilbaok, erantzun bateratuak emoteko sasoia da, hau ez da epaitegietan bakarrik jorratzen; beharrezkoa da herri gogoa aktibetea.