Euskaltzaindiak eta Eusko Legebiltzarrak Euskara... Plazan! izeneko ekitaldia antolatu dabe Euskerearen Nazinoarteko Egunerako, abenduaren 3rako. Bertan, bi erakundeok beste sei hizkuntzatara (poloniera, hebreera, finlandiera, nederlandera, georgiera eta errusierara) ekarri daben Bernart Etxepareren Linguae Vasconum Primitiae liburua aurkeztuko dabe eta Koldo Mitxelenari gorazarre egingo jako. Ekitaldia EiTBren laguntzaz gauzatuko da Eusko Legebiltzarrean eta zuzenean eskainiko dau EiTBk abenduaren 3an, 09:00etatik aurrera.
Akademiako iturriek jakinarazo dabenez, euskerea plazan da, auzoko eta munduko plazan, eta hori aldarrikatuko dabe ekitaldiak berak eta erakundeok egunerako beren-beregi atondutako mezuak.
Bernart Etxepare eta Koldo Mitxelena izango dira ekitaldiko bi erreferentziak. Euskaltzaindiaren eta Eusko Legebiltzarraren arteko lankidetzeari esker, euskeraz ezagutzen dan lehenengo liburua polonieraz, hebreeraz, finlandieraz, nederlanderaz, georgieraz eta errusieraz argitaratu eta aurkeztuko da lehenengo aldiz. Ekitaldian, Koldo Mitxelena hizkuntzalari euskaltzainaren jaiotzearen mendeurrena gogoratu eta omenaldia eta autortzea egingo jako. Koldo Mitxelenak esan eban legez, Eragozpenak eragozpen, plazara ginen Etxeparez geroz, eta plazan iraungo dugu, gerta ahala gerta, baldin asmoz eta jakitez -ausarki, eta halere neurriz- jokatzen badakigu.
Eusko Legebiltzarrak eta Euskaltzaindiak 2011. urtean lankidetza hitzarmena izenpetu eben eta hitzarmen horretan, besteak beste, alkarregaz liburuak argitaratzeko ahalbidea agiri da. Hori dala eta, 2011. eta 2013. urteetan, Bernart Etxepareren Linguae Vasconum Primitiae liburua berrargitaratu eben, hainbat hizkuntzatan; lehenengoa gaztelaniaz, ingelesez, frantsesez, alemanez eta italieraz, eta bigarrena, galegoz, katalanez, errumanieraz, kitxuaz, txineraz eta arabieraz.
Era berean, edizino bi horreetan liburuaren faksimilea eta euskerazko gaurko grafiara ekarrita testuak be argitara emon ziran, sarrera eta aurkezpenakaz batera. Oraingo honetan, B. Etxepareren Euskara Jalgi Hadi Plazara aldarria gogoratuz, dagoeneko euskerea plazan dagoala azpimarratzeko, goiburu horregaz egingo da ekitaldia, Eusko Legebiltzarrean, 09:00etatik aurrera, eta EiTBk zuzenean emongo dau, zabalkundean EiTB lankide izango dabelako Eusko Legebiltzarrak eta Euskaltzaindiak.
Ekitaldian, Etxepareren idatziak eskainiko dira polonieraz, hebreeraz, finlandieraz, nederlanderaz, georgieraz eta errusieraz, hizkuntza horreen eta euskal kulturearen eta hizkuntzearen arteko sarrera-azalpen bat bidelagun dabela, Xabier Kintana euskaltzainak eta edizino arduradunak paratua.
Era berean, Frantziako Biblioteka Nazionalean gordeta dagoan Etxepareren faksimilea eta euskerazko gaur egungo grafiara ekarririko testuak be jaso dira argitalpenean.
Euskal testuaz eta aitatutako itzulpenez gan, argitalpen barriak Bakartxo Tejeria Eusko Legebiltzarreko presidentearen eta Andres Urrutia euskaltzainburuaren hitzaurre bana jaso ditu.