'Grecia: Reinventarse para sobrevivir' filma Bilbon ikusgai 'Hileko Dokumentala' zikloaren barruan

Hileko Dokumentala, Bilboko Dokumentalen eta Film Laburren Nazinoarteko Jaialdiak, Zinebik, urte osoan zehar bere programazinoari jarraipena emoteko antolatu dauen estreinaldien zikloak, Elena Zervopoulouk zuzendutako Grecia: Reinventarse para sobrevivir (2014. 78 minutu) greziar filma eskainiko dau urtarrilaren 28an, eguenean. Film horrek sariak jaso ditu hainbat jaialditan, DocsBarcelona International Documentary Film Festival jaialdian, esaterako. Proiekzinoa Bilboko Multicine 7 aretoan izango da, 20:00etan. Sarrereak 3,70 euro balio dau. 

Greziako krisialdia azaltzen da film honetan, euren patua gobernau gura daben hiru personaiaren ikuspegitik. Giorgios etxe barik geratu da gainbehera ekonomikoaren ondoren eta bizimodu barria antolatzen dabil; Grigorisek alde egin dau uritik bere familiagaz, bizimodu barriaren bila mendian. Azkenik, Ilias Patata mobimentuko kide egin da, elikadura-kateei aurre egiteko, alkartasunaren eta zuzeneko demokraziaren bidez. Krisiak Europa barruko desbardintasunak areagotzen dituan bitartean, hiru personaia horreen adoreak gizakiek errealidadea aldarazo leikiela ekarten deusku gogora.

Elena Zervopoulou film luzeen munduan sartu da lan honegaz. Greziar zuzendari honek Etnopsikologia ikasi eban Paris 5 Unibersidadean. UNESCOren aholkulari be izan da Madagaskarren kalean bizi diran umeei buruzko proiektu batean. Nanterreko Unibersidadeko Antropologia eta Zinema Dokumentaleko masterra dauka. Zenbait proiektu gauzatu ditu mundu osoko GKEentzat. Sea Gypsies (2012) film laburra be zuzendu dau, BBCren Why Poverty? dokumentalen sailaren barruko filma da.

Zinebik, Bilboko Dokumentalen eta Film Laburren Nazinoarteko Jaialdiak jarraipena emongo deutso urte osoko programazinoari Hileko Dokumentala izeneko zikloagaz. Ekimen horren bitartez, generoaren zaletuek, nazinoarteko beste jaialdi batzuetan sariak irabazi dituen edo aukeratuak izan diran arren, merkataritza zirkuituan ia banaketarik lortu ez daben lanez gozetako aukerea izaten dabe. Esangura horretan, Parallel40 banaketa-etxearen eskutik, Multicines aretoek, zientziari, ekonomiari edo gizarteari buruzko erabateko gaurkotasuneko gaiak jorratzen dituen dokumentalak estreinetan ditue.