Apirilaren 23ko Liburuaren Nazinoarteko Eguna bookcrosssing baten bidez ospatuko dau Bizkaiko Foru Liburutegiak. Liburuak leku publikoan lagatzea, beste batek hartu eta irakurri daiazan, da bookcrossingaren oinarria. Liburutegiak 400 ale inguru askatuko ditu Bizkaiko hainbat txokotan. Helduentzako ez eze, gazteentzako liburuak be itxiko ditue oraingoan.
Laugarrenez egingo dau bookcrossinga Bizkaiko Foru Liburutegiak aurtengo Nazinoarteko Liburuaren Egunean. Baina, aurten lehenengoz, ume eta gazteentzako liburuak be badagoz tartean, helduen literatureagaz batera. Hartara, ekimenaren onuradun izan leitekezan irakurleen kopurua handituko dabe.
Apirilaren 18tik 22ra askatuko ditue 400 liburuak. Euskerazko eta gaztelaniazko tituluak aukeratu ditue, genero ugaritakoak. Eremu publikoetan, jentea hara eta hona dabilen lekuetan, lagako ditue liburuak: Plazetan, parkeetan, pasealekuetan eta abar.
Bilbon, Balmasedan, Durangon, Gernika-Lumon eta Markina-Xemeinen egingo dabe ekimena, Bizkaiko Foru Aldundiak aurreratu dauenez. Libururen bat topetan dauen personeak berau hartu eta irakurri ahal izango dau eta, bookcrossingagaz segiduteko, gero beste leku publiko baten lagatzeko eskatzen da, holan beste irakurle batek be disfrutau ahal izan daian. Mende hasikeran Estadu Batuetan sortutako sistemea da bookcrossinga.
Liburuaren Nazinoarteko Egunaren inguruko ekimen berezi hori antolatzeko, lekuan lekuko udal liburutegien laguntzinoa euki dau Foru Liburutegiak.