Une batez pentsa ezazu Vik umea eta gurasoak hiri berri batera iritsi direla, aita maiz aldatzen dute lanez eta oraingoan beste hiri bat ezagutu beharko du umeak.
Horrela hasten da Yoko eta lagunak pelikula. Eta etxeko leihotik parke eder bat ikusten da. Parkea bera bilakatuko da marrazki bizidunetako kokaleku nagusia, eta bertako estatua bat protagonista nagusia, umeekin jolasten duelako.
Orain imajinatu dezagun gure inguruko parke bat. San Pedro plazan edo Botikazarrean, adibidez. Edo beste edozein. Umeen jolasleku. Guraso askoren topagune. Bizitzako ziklo garrantzitsua betetzen dute, dudarik gabe. Hemen eta han. Mundu osoan.
Film honetako arduradunek munduko parke asko bisitatu dituzte lana egiterakoan. Eta parke bizi bat islatu dute marrazkietan. Bizi-bizia, alaia, koloretsua eta jolasgarria. Hori delako, izan, parke baten funtsa, umeek ondo pasatzeko lekua izan behar du. Beraien neurrira eta irudimenak sortzen duen guztia leku-tzeko modukoa. Euskal Herriko ekoiztetxe batek sortu du filma, nazioarteko beste talde oparo batekin batera. Somugak nazioarteko proiekzioa izango duen lana burutu du. Euskal Herrian ez ezik, nazioartean ere ikusteko aukera izango dute umeek. Gurean behintzat, euskaraz ikusteko aukera dago.
Vik umeak, Oto eta Mai ezagutuko ditu parkean. Beraiekin jolasean hasiko da. Eta hirurek lagun berria egingo dute: Yoko. Berez, parkeko estatua bat da. Baina amets egiten dakitenek Yokorekin jolasteko aukera izango dute, eta zelan gainera. Irudimenari gorazarre egiten dio Yokok, eta adin guztietako umeak jarriko ditu jolasean, helduentzat ikusezina den arren.
Jolasaren gorazarrea da filma. Eta jolas berriak eta errazak planteatuko dizkio ikusleari. Jolas parkeen aldarrikapena ere bada. Eta gogoetarako beta ematen du aldi berean. Eta zinemara hurbiltzen diren neska-mutikoei koloretako koadernoa eskaini diete sarreran. Umeek margo dezaten, marraztu, moztu, irakurri… eta jolas berriak planteatzen ditu berarekin. Ez da marketing produktu hotz eta salgarria, jolaserako proposamena baizik. Ez da gutxi.
Parkea ixteko ordua da. Guraso okupatuek nork berean jarraitzen dute. Lanari buruz, telefonoari begira, jolasik gabeko bizitzan estresatuta. Eta beste hiri batera joateko prest ia-ia. Jolasak, eta umeen solasak gauzak beste era batera begiratzen lagunduko digu ordea. Filma euskaraz ikusi edo kalera olgetan joatea, bi aukera dira. Biak onak. Biak behar-beharrezkoak.