Larunbat honetatik, hilak 18, otsailaren 28ra bitartean, Bilboko Aratusteak ospatuko dira. Jai-batzorde mistoak gaur egin duen agerraldian azaldu duenez, "duela hiru urte abiatu genuen asmo handiko Aratusteen eredua, eta sendotze-bidean dagoen altxorra dugu jada". Horren froga izan da ekitaldira ekarritako piraten kutxa, "jende askotarikoaren gozamenerako proposamenez beterikoa” gehitu dutenez. Gainera, barruko ekintzetako batzuk nabarmendu dituzte.
Otsailaren 18an, larunbata, antzinatik berreskuratu eta sendotutako kopla txikien lehiaketa izango da Zabalguneko Eraikinean; ekimen horrekin abiatuko dira aurtengo Aratusteak.
Aurkezpenean, deia egin diete bilbotarrei aspaldiko Bilboko mozorro tradizionalak ere haien etxeetan prestatu ditzaten: Higi, Hartza, Fraisku, Momo, Monja eta Turko mozorroak, hain zuzen ere, eta ostiral mehean, otsailaren 24an, mozorro horiek jantzita joan daitezen Farolin eta Zaranbolasi Plaza Barrian egingo dieten epaiketara.
Eta Aratuste-larunbatean, otsailaren 25ean, egun osoz kalera ateratzera animatu dituzte herritarrak. Izan ere, Aratusteek Bilboko erdigunea hartuko baitute bete-betean, egun osos festa, besterik ez da izango. Kale Nagusia sukalde erraldoi bilakatuko da, eta, gainera, hamaika ekitaldiz beteriko programa osatu dute inguru horretako hainbat gunetan: umeentzako tailerrak, kontzertuak, fanfarre eta erraldoiak, mozorroen kalejira-lehiaketa…
Bestalde, agerraldian argi utzi dute ez dutela onartuko emakumeon aurkako erasorik mozorro artean ezkutatzerik: "Aratusteetan ere festa aske bizi nahi dugulako, halakoek ez dute lekurik gure itsasontzian! Kaleak, gauak eta jaiak gureak ere badira!".
Bilboko Konpartsekin eta Udalarekin elkarlanean dabiltzan eragile guztien lana goraipatu eta eskertu dute. Adierazi dutenez, "jai-giroan murgiltzen gaituen altxor handia lortzeko danon indarrekin egingo dugu arraun. Aratuste-eredu honi heldu genionean, oso argi geneukan bilbotar guztion artean eraiki beharko genuela, eta pozik esan dezakegu gure itsasontzian igo direla jada Bilbo erdialdeko eta Zazpi Kaleetako eragile asko eta asko: tabernari, dendari, auzo-elkarte... Eta nahaste zoro eta koloretsu horretan, tripulatzaile garrantzitsuenak zaratenok gonbidatu nahi zaituztegu gaur: kaleko jende, gazte edo zahar, bilbotar peto edo bisitari, izan bidaiari edo errefuxiatu, danak zarete ongi etorriak, guztion artean Bilboko Aratuste Handiak eraikitzeko".
Nabarmendu dituzten ekintzez gain, aski ezagunak eta ospetsuak diren bestelako hamaika proposamen aurkeztu dituzte: pontxe- eta torrada-txapelketa; ostegun gizeneko Zazpi Kaleetako kontzertuak; ostiral meheko eskolen desfilea; neguko giroa eta sabelak epeltzeko sasoi betean dauden bertoko indaben igandeko txapelketa; asteleheneko Plaza Barriko familientzako kontzertua; eta asteartean, "negar eta su artean, gure sardina maiteari egingo diogun agurra", aipatu dutenez. Egitarau-liburuxkak doan eskuratu ahal izango dira taberna, udaltoki eta abarretan.