Gaur goizean, Nerea Matutek eta Saioa Dominguezek aurkeztu dute atzerako kontaketa, Itsasne Nuñez txupinerarekin eta Bilboko Jai Batzorde Mistoko hainbat kiderekin batera. Konpartson ordezkariek agerraldia egin dute Bilboko Plaza Barrian. Bertan gogorarazi dugunez, Aste Nagusiaren hasierarako 100 egun falta dira: “hiru urte esperoan eman ondoren, azkenik, ehun egun barru bilbotarrontzat hain garrantzitsua den astea iritsiko da”, ziurtatu du Dominguezek.
Botoi gorri handi bat sakatuta, Itsasne Nuñez txupinerak hasiera eman dio pantailatzar batean erakutsi dugun 100 eguneko atzerako kontaketari, Bilbokokonpartsak.eus webgune honetan etengabe martxan dabilen bertsio digitalari. Nuñezek 2019ko Aste Nagusian izan zuen suziriak jaurtitzeko ardura eta oraindik jarduneko txupinera da, lekukoa pasa bitartean. Aurreikusita zegoen Bea Sever pregoilariak ere parte hartzea ekimenean, baina familia konpromiso bat tarteko, ezinezko egin zaio bertaratzea.
Bilboko Konpartson ordezkariek azaldu dutenez, 100 egun barru, abuztuaren 20an, Arriaga antzokiko balkoitik txupinera berri batek txupina jaurtiko du; txupin horrek seinalea emango du eta, “haren eztandarekin batera, gure botxo maitean hain beharrezkoak ditugun kaosa eta algara, festa eta poza Nagusituko dira”.
Konpartsakideok irrikitan agertu gara “hiru urteko jai-garizuma luzeari” amaiera emateko, eta gogorarazi dugu “goxak eta erlojuak sinkronia galtzen duten bederatzi eguneko aste zoragarri hori gero eta hurbilago” dagoela, Kepa Junkera eta Edorta Jimenezen “Badator Marijaia!” kanta mitikoari erreferentzia egiten. Gure ustez, jada “suma daiteke” giro hori Bilbon. Horregatik, “egunez egun gogoan izan dezagun, atzerako kontagailua martxan jartzea” pentsatu dugu konpartsok.
Atzerako kontaketak, baina, kontagailu fisikoa ere izango du; larunbat honetan jarriko dugu, Plaza Barriko balkoietan, “motorrak berotzeko” konpartsok antolatu dugun Kapela Eguneko ekitaldien baitan, eguerdiko ordubata eta erdietan. Bertan parte hartu nahi izango duenak “nahikoa izango du buruan kapela edo txano bat janztea eta, jaiaz gozatzeko gogoa”, adierazi dute Matutek eta Dominguezek.
Kapela Eguneko egitaraua
Zapatu goizean, Kapela Tour batekin hasiko dugu eguna, udaletxetik egingo dugun ibilbidearekin. Goiz osoan zehar, 11:00etatik 14:00etara, Kapela-azoka izango da Plaza Barrian; leku berean izango dira ere hurrenez hurren txapelgintza tailerra, 11:00etan; eta Kapela Lehiaketa, 12:00etatik 13:00etara; sariak banatuko dira ondoren. Bitartean, dantza-plaza izango da. 13:30ean, atzerako kontaketaren kontagailu analogikoaren estreinaldi mundiala izango da, Plaza Barrian. 14:00etan kalejira izango da fanfarrearekin Zazpi Kaleak girotzeko eta, arratsaldean, Kapela-poteo musikatua izango da Unamunotik abiatuta. Amaitzeko, 19:30ean, kapeladun Bilbo Kantari berezia izango da, Bolsatik abiatuta.
Badator Marijaia!
#NGS22 #KapelaEguna