uriola.eus

Lantokietan aukera sexuala askatasun osoz biziko dugu

Erabiltzailearen aurpegia   Iritzia

Maiatzaren 17an, Munduko Osasunaren Erakundeak homosexualitatea buruko gaixotasunen artetik kendu zuela gogoratzen da. Guk behintzat ez dugu ezer ospatzeko, Gaia jendartean ez dago normalizaturik, nahi ez delako gainera, gutxiago lantokietan, eta transexualitatea gaur egun oraindik buruko gaixotasun kontsideratzen da.

Bizi dugun egoera sozio-ekonomiko honetan, aniztasun sexualeko kideen lan eta bizi baldintzek okerrera egin dute, eta horrek normalizazioa kaltetu baino ez du egin. Azkenaldian, gorroto delituek gora egin dute, aniztasun sexual eta funtzionalen kasuen aurka, emakumeenganako indarkeriarekin gertatu den bezala. Izan ere, sistema honek zapaldu eta zapaltzaileak behar ditu aurrera egiteko. Harreman horretan oinarritzen da kapitalismoa aurrera egiteko.

Lantokiak jendartearen ispilu dira, eta gure ustez, beste eremu batzutan baino errazagoa da diskriminazio eta erasoak izatea, hezkuntza guneekin batera. Izan ere, gaizki ulertutako auto-defentsa praktikatu beharra dugu dagoen konpetentziaren aurrean, prekarietateak, erreforma ezberdinek eta murrizketek kaltetuak izanik.

Lan eremuan horrelako egoerak izatearen eta aniztasun sexualdun pertsonek bere eskubideak bermatuak ez izatearen arduradun erakunde publikoak ere badira. Kalean zein lantokietan inolako diskriminaziorik ez erasorik ez izatearen bermatzaile izan beharko lukete erakundeek. Gure ustez, sistema hau bere horretan mantentzeko, gorroto hori sustatzeko tresna dira erakundeak. Gaurkoa bezalakoetan propaganda kanpainak egingo dituzte, guztiz jarrera hipokrita dela deritzogu bestelako jendarte anitza oztopatzen duten bitartean.

Aurreko egoerek lantokietako giroa kaskartu egiten dute, gure lan osasuna eta pertsonen arteko harremanak kaltetzen dira. LABek egoera horri galga jarri nahi dio, horretarako langileei tresnak jarri dizkiegu, lantokietan gai hau lantzeko gida eta protokoloa dauzkagu. Gure egitekoa langileen artean gai honetan sakontzea, aniztasuna ikustaraztea, diskriminazio eta jazarpen egoerak sustraitik gelditzea eta anistazuna duten guztien eskubideak bermatzea izango da.

Lan hori egiteko baina, jendarteko gainontzeko eragileekin erkarlana egin behar dugu, gainontzeko sindikatuekin, eragile sozial eta politikoekin.

 

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa