Santutxuko Udaltegiak Zine Kurduaren Erakusketa jasoko du gaurtik ostiralera bitartean, Bilboko Kultura Sailaren 'Kultur Gabonak' programaren barruan. 'Newroz' Euskal Kurdu Elkartearen laguntza duen zikloak, nazioarteko jaialdietan saritutako fikziozko bost film eta bi dokumental jasoko ditu. Gehienak lehen aldiz ikusi ahal izango dira Estatu osoan.
Programazioak lan hauek jasoko ditu: 'Los niños de Diyarbakir' (Miraz Bezar, 2009), 'My Sweet Pepperland' (Hiner Saleem, 2014), 'Acude a mi llamada' (Hüseyin Karabey, 2014), 'Kobanê, volver a empezar' (HispanTV, 2015) eta 'Solo los muertos vuelven a casa' (Tina Leisch eta Ali Can, 2105) dokumentalak. Proiekzio guztiak jatorrizko bertsioan eskainiko dira, gaztelaniazko azpi-tituluekin, eta arratsaldeko 19:00etan hasiko dira. Sarrera librea izango da.
Film horietako hainbatek sariak jaso dituzte nazioarteko zenbait jaialditan. Horrela, 'Los niños de Diyarbakir' lanak, adibidez, Epaimahai Gaztearen Saria lortu zuen 2009ko Donostiako Nazioarteko Zinemaldian, eta 'Acude a mi llamada' filmak Lehen Saria Lortu zuen Mar del Platako Nazioarteko Zinemaldian (Argentina). 'My Sweet Pepperland' Canneseko zinemalditik igaro zen, eta bertan oso harrera ona jaso zuen kritikaren aldetik.
Gaur, abenduak 14, zikloa irekiko duen filma, 'Kobanê, volver a empezar' erreportajedokumentala da. Lanak erabateko gaurkotasuna du, Siria iparraldean dagoen eta biztanle gehienak kurduak dituen hiri horren askapena lantzen baitu. Irailaren hasieran, joan den azaroaren 13an Parisko atentatuak egin zituen Daesh talde terroristari aurre egiteko mundu mailako lehenengo harresia bilakatu zen hiri hori.
Askatu ondoren, eta hiriaren %80 suntsituta zegoela, Hispan TV-ko talde bat Kobanen sartu zen, setioaren ondorioak, biztanleria zibilarengan izandako ondoreak eta normaltasunera itzultzeko esfortzuak zuzenean ezagutzeko.
Programazioaren gainerakoak oso gai anitzetako lanak jasotzen ditu. Mota askotako baliabide estetikoak erabiliz, barne gatazkak eta Europan zehar sakabanatutako milaka pertsona dituen herrialdearen egoera zaila erakusten dute.
Egitaraua
- Abenduak 14, astelehena: 'Kobanê, volver a empezar' (51').
- Abenduak 15, asteartea: 'Los niños de Diyarbakir' (102').
- Abenduak 16, asteazkena: 'My Sweet Pepperland' (100').
- Abenduak 17, osteguna: 'Were Denge Min' - 'Acude a mi llamada' (2014, 105').
- Abenduak 18, ostirala: 'Solo los muertos vuelven a casa' (84').