Santutxu futbol taldeak bere mendeurrena ospatuko du 2018an. Hori ospatzeko, hainbat ekitaldi egingo dituzte bai futbol zelaian, bai auzoan. Lehenengo ekitaldia eguenean izango da, Gran Bilbao hotelean. Bertan, mendeurreneko ekintzak aurkezteko gala egingo dute.
Galan, urtean egingo dituzten ekintzak azaltzeko erabiliko dute. Aurreratu dutenez, futbol taldearen historia laburtzen duen 10 minutuko bideoa emango dute. Horrez gain, urte honetarako himno berri bat prestatu dute, eta galan egongo da entzungai lehen aldiz.
Urteurrenaren programa, bandera, bertsolariak eta auzoan egingo dituzten ekintzen egutegia ere gala horretan jakitera emango dute. Galara joateko gonbidapena beharrezkoa izango da, lekua txikia delako, baina klubaren nahia urteurreneko ekintzak auzo guztiarentzako egitea dela adierazi dute.