uriola.eus

SomeraFest jaialdia bertan behera geratu da "Bilboko Udalak ez duelako baimendu"

  Udal gaiak  Alde Zaharra

Iaz lehen SomeraFest jaialdirako baimena eskuratzeko "inolako arazorik" ez zuen izan Gora Somera Elkarteak. Horregatik, aurten, "erantzuna baiezkoa izango zelakoan", prestaketa lanak hasita zituen bigarren ediziorako. Erantzunik jaso ez zutela eta, elkartekideek uztailaren 7an Udalera jo zuten berriro ere. Atzo jakinarazi zieten erantzuna "ezezkoa" zela.

Kaleko hainbat ekintzaren ondorioz, Somera kalea "akustikoki saturatuta" dagoela esanez erantzun dio Bilboko Udalak Gora Somera Elkarteari, eta horrek auzotarrei "enbarazu" egiten diela. Musika darabilten jarduerak "salpuespen gisa" baimentzen dituela argudiatu dute Espazio Publikoaren Erabilerarako Bulegotik.

"Harrituta eta desengainatuta" agertu dira Gora Somera osatzen duten merkatari eta tabernariak Udalaren jarrerarekin. Bai ordutegiagatik -13:30etatik 15:30etara- bai auzotarren inplikazioagatik, SomeraFest "kultur eta jai ospakizun baikorra da, batere kalterik eragiten ez duena".

Elkarteak adierazi du lanean jarraituko duela kultur, arte eta gizarte ekimenak antolatzen eta "gure kaleak denontzat hobetzeko ekintzak bultzatzen".

Baimena jasoko zutelakoan, elkartekideek prest zeuzkaten jada bigarren SomeraFesteko kartelak, musika taldeen kontratazioa, komunikazioa, lantaldeko kideen zereginen antolaketa eta abar.

Larunbaterako lotuta zeuzkaten hiru musika taldeak The Bilus Moon (pop-rock eta soul bertsioak), Dingos & Flamingos (outlaw rock) eta Feiz No Mor (Faith No More gogoan) ziren.

www.gorasomera.com

 

 

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa