1981eko uztailaren 10ean, Bilboko Zazpi Kaleetako Barrenkale Barrena kalean, Polizia Nazionala, ustezko bi ETAkideren atzetik zihoala, beraien aurka tiroz oldartu zen. Tiroketa hartan, 29 urte zituen Ovidio Ferreira Martin, bi tiroz zauritua izan zen eta lau egunez koman egon ondoren, hilaren 14an, hil zen. Berarekin batera, 48 urte zituen Aurora auzokidea ere tiroz zauritua izan zen.
Gaur, duela 34 urte bezala, Bihotzean Auzo Elkarteak "salaketa berdina" egin du: "Nahiz eta bertsio ofizialak beste irakurketa oso ezberdin bat egin, jakina da Polizia espainola izan zela inpunitate osoz, gure bi auzokideren aurka tirokatu zuena, balen traiektoria bakarrak horrela argitu zuen, eta gaur egun oraindik ez da erailketa haren errudunik azaldu".
Ovidioren kasua "bitxia" bihurtu da Bihotzean elkartearen esanetan. Urteen poderioz, ahazturan egon ondoren, ETAko biktimen zerrendetan aurkitzen da egun, "Alde Zaharrean aspalditik dakigun arren, benetan, Polizia Espainolaren balek, Estatuaren inpunitateak erail zuela". Horregatik diote elkartetik, "ez dugu egunkari banatzaile gazte haren memoria zikintzen utziko".
"Oroimena, egia osoa eta justizian oinarritutako bake iraunkor bat lortzeko bidean", gaur, Ovidioren memoria gogora ekarri dute bezala, "estatu indarkeriak eraildako guztiena ere mahaigaineratu nahiko genuke", adierazi dute elkartekideek. Horrekin batera, "Euskal Herrian bizi dugun gatazka politikoa konpontze bidean, indar errepresibo guztien desaktibazioa" eskatu dute, "herri honek bakerako bidea inongo injerentzia bortitz gabe egin dezan".
Gaur, uztailak 14, 34 urte betetzen dira, Polizia Nazionalak, Ovidio Ferreira, Bilboko egunkari banatzailea, tiroz erail zuela. Bilboko Alde Zaharreko auzokideek, bere oroimenez, lore eskaintza eta kartel informatiboak jarri dituzte, bere heriotzaren 34. urteurrenean.