Hurrengo astean 42 urteko kartzela zigor eskariari aurre egin behar dioten hiru gazteak babesteko, "Greben aurrean muntaia polizialik ez" lelopean, larunbateko manifestazioan (12:30ean Jesusen Bihotzean) eta epaiketa egunetan kontzentrazioetan (9:30ean Buenos Aires kalean) parte hartzeko mezua zabaldu dute eragileek.
Duela hiru hilabete sortu zen Grebalariak aske! plataforma “muntaia polizial bat salatzeko” eta datorren astean epaituko dituzten Bilboko lau gazteren absoluzioa eskatzeko. Lau lagunei 2012ko martxoaren 29ko Greba Orokorrean, Bilboko epaitegiaren aurrean jazotako istiluetan parte hartu izana leporatzen diete eta haietako hiru, Jon Telletxea, Urtzi Martinez eta Aitor Fernandez hilaren 11 eta 12an epaituko dituzte. Fiskalak 42 urtetik gorako espetxe zigorra eskatzen du haientzat, 14 urte inguru bakoitzarentzat. Bestalde, Irantzu Yaldebere beste auzitegi batean epaituko dute garai hartan adingabea zelako.
Grebalariak aske! plataformaren arabera “beste eredu sozioekonomiko baten aldeko borroka eta konpromisoa da; kolpe errepresibo honek bi helburu dituelarik: borroka sozialen kriminalizazioa eta sektorerik mobilizatuenen desaktibazioa”.
Hitzorduak
Datorren larunbatean, irailak 7, 12:30ean, Jesusen Bihotza plazatik manifestazioa abiatuko da. Irailaren 11an eta 12an, epaiketaren egunetan, mobilizazioa egingo da Buenos Aires kaleko epaitegien aurrean, 09:30etatik aurrera. Bukatzeko, irailaren 11n, Deustun manifestazioa egingo dela iragarri dute. Martxa 19:30ean abiatuko da Done Petri plazatik.
INFO + GREBALARIAK ASKE!
Plataformako kide Jose Moralesen adierazpenak entzuteko (INFO 7)