uriola.eus

Bizkaiko Foru Aldundiaren "tratu txarra" salatu du Ignacio Robles suhiltzaile kontzientzia eragozleak

  Jendartea  Bilbo

Saudi Arabiara bidaltzekoak ziren armen zamaketan ez parte hartzeagatik Aldundiak zabaldu dion espedientearen berri "egunkari baten bitartez" izan zuen  Ignacio Robles suhiltzaileak. Berarengana ez dela foru erakundeko inor zuzendu adierazi du, deklaratzera deitu zioten arte, joan den ostiralean. Lau urtez kargugabetu dezakete. 

Bizkaiko Foru Aldundiaren "tratu txarra" salatu du Ignacio Robles suhiltzaile kontzientzia eragozleak
Argazkia: Ecuador Etxea | Ikusi handiago | Argazki originala

Hasiera batean armen zamaketan laguntzeari uko egin ziola zabaldu zen arren, Ignacio Robles suhiltzaileak argitu duenez, ez zion uko egin agindutako lana betetzeari, "kontzientziagatik ezin nuela parte hartu" esan zien Bilboko Portuan berarekin batera lanean ari ziren kideei. Egoera horren aurrean, beste lankide bati deitu zioten. Beste suhiltzaile hori agertu arte itxaron zuen Roblesek. Azkenik, bonbak zamatu zirela eta, bere erabakiak "batere kalterik eragin ez" zuela dio kontzientzia eragozleak. 

Egun hartan hasi zen suhiltzailea lehen presioak jasotzen. Gertatuaren berri Gobernuko ordezkariari eta Diputazioari emango ziotela aipatuz hasi ziren portuan. Aurrerago, bere jarreragatik espedientea zabalduko ziotela jakin zuen "egunkari baten bitartez", eta ez Bizkaiko Foru Aldundiaren bitartez. "Presioak izan dira lehen unetik", salatu du Roblesek. "Horrelako zerbait berriro ez gertatzeko edota adibide gisa zabaltzeko". Baina bitan pentsatu ostean, "ezin nezakeen beste ezer egin", gaineratu du.

Joan den ostiralean bi ordu eta erdi eman zituen deklaratzen bere espedientearen instruktorearen aurrean. Lau urtez kargugabetu dezakeen arduradunarengan "konfidantza" agertu du suhiltzaileak.    

Besteak beste, Bizkaiko Batzar Nagusietako atarian Ongi Etorri Errefuxiatuak plataformako kideek babestu zuten Robles txalo eta "Bizkaitik bonbarik ez" oihu artean.

 

[2017-05-26] Armak zamatzeari uko egin zion suhiltzaile kontzientzia eragozleari babesa

[2017-04-07] Bilboko portuan lehergailuak kargatzeari uko egin zion suhiltzailearen aldeko babesak ez du etenik

[2017-04-03] Saudi Arabiarentzako arma bidalketan parte hartzeari uko egin dio suhiltzaile batek Bilbon

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa