Imanol Pradalesek eta Eneko Arruebarrenak gau bakar batean erabat itxuraldatua izan den geltokia bisitatu dute. Muntaketa konplexu horretarako, 60 pertsona aritu dira lanean eta 300 m²-tik gora binilo erabili dituzte. Metro Bilbaoko Moyuako geltokia jatetxeen galeria bat bilakatuta esnatu da. Muntaketa konplexu baten beharra izan duen argitaragabeko ekintza bat izan da, The World´s 50 Best Restaurants gertu dagoela iragartzen duena; Bizkaiak 2018an etxean hartuko duen ekitaldi handietako bat.
Gaurtik aurrera eta ekainaren 20ra arte, Moyuako geltokia erabiltzen edo zeharkatzen dutenak harrituta geldituko dira lurraldeko sukalde eta aretoetan inspiratutako jatetxe ezberdinen birsortzearekin. Hori guztia posible egiteko, beharrezkoak izan dira 790 m² PVC inprimaketa eta 300 m² binilo.
The World´s 50 Best Restaurants
Gastronomiako Oscarrak izenez ezagutzen diren sariak Euskalduna Jauregian banatuko dira datorren ekainaren 19an, eta nazioarteko sukaldaritza eremuko chef, sukaldari, kritikari, kazetari eta iritzi-lider onenak erakarriko ditu lurraldera.
Ekitaldia ekainaren 16an hasiko den jardueren agenda ofizial baten amaierako puntua izango da. Aipaturiko datan, lehenengo parte-hartzaileak lurraldera iristen hasiko dira. Ekainaren 17an, Basque Culinary Centerren joerei eta #50BestTalks berrikuntza gastronomikoei buruzko konferentziak egingo dira.
Hurrengo egunean, ekainaren 18an, Guggenheim Museoan, edizio honetarako berariaz diseinatu den ekimen bat izango da, artea eta gastronomia elkartuko dituena. Gau horretan bertan, Atxondoko harana Chef´s feast (chefen otordu tradizionala) ekitaldiaren eszenatokia izango da. Antolatzaileek aukeratu dute Bizkaiko landa-paisai idilikoa chefak euskal gastronomiarekin eta Bizkaiko eta Euskadiko produktu onenekin gozarazteko.