UdalBerriren ustez ez da Bilbok bi abiadura izatea, baizik eta aurkako noranzkoetan doala udal-gobernua. Alderdiak azaldu duenez “Gehiegizko inbertsioa hartzen duten erdialdeko auzoak ditugu alde batetik, turismoarentzat glamour handiko guneak izanik, eta bestetik, aldiz, goialdeko auzo baino gehiago, kanpoko begiradatik eta propaganda mediatikotik ezkutatutako auzoak ditugu. Nola azaldu behar dugu, orduan, gure hiri saritu honetan, auzoen arteko izugarrizko aldeak egotea bizi-itxaropenari dagokionez? Eta hori Bilboko herritarren artean batez besteko errentari dagokionez dauden desparekotasun itzelak ez aipatzearren”.
Horregatik guztiagatik, UdalBerrik ez du sinatuko alkatetzak proposatutako ituna. Bozeramaileak esan duenez “Horrela, Bilboko Auzo Elkarteen Federazioaren hitz doiak gure eginez, ezetz esaten dugu, zeren eta Aburto jaunak planteatzen duena zera baita auzorik gabeko auzoen aldeko itun bat, ez besterik”.
EH Bilbuk, ere, berdina egingo duela azaldu du. Beraien hitzetan "Aburtok ezin du auzoentzako itun bat proposatu bertan bizi diren pertsonen iritzia kontuan hartu gabe". EAJk eta PSEk herritarren parte-hartzea ekidin dutela adierazi dute, eta, horrez gain, edukirik gabeko ituna dela adierazi du bozeramaileak. Beraz, ez dutela Auzoentzako ituna sinatuko adostu dute. Jarrera berdinarekin azaldu da Goazen Bilbao. Samir Lahdouk ez dutela ituna sinatuko esan berri du.
Bilboko auzoak
Bilboko auzoen desberdintasunak argi geratu dira azkenengo egunetan plazaratu den informazio guztiarekin. Ikusi daitekeenez, auzoen arteko desberdintasunak gero eta handiagoak dira. Abando edo Indautxu bezalako auzoetan inbertitzen den, eta auzotarrek dituzten soldatak Peñaskal, Otxarkoaga, Arangoiti edo Altamira bezalako auzoekin alderatuz, lehenengo eta bigarren mailako auzoak eta auzotarrak eragiten dituzte.
Joera hori aldatzeko tresnak behar direla aldarrikatu dute EH Bilduk, Goazen Bilbok eta UdalBerrik. Udal-gobernuak, berriz, Auzoentzako ituna aurrera atera nahi du, baina ez du talde guztien sinadura edukiko. Izan ere, auzoen arteko desberdintasunak gora doaz azken urteetan, eta hori ekiditeko gaur arte ezer gutxi egin dela azaldu dute oposizioan dauden alderdiek.
Bitartean, Bilbo erdiguneako auzokideen errentak gero eta altuagoak diren bitartean (34.000€ inguru) erdigunetik urrunago bizi diren auzotarrenak gero eta baxuagoak dira. 15.000 €ra heltzen ez direnen auzoen artean Otxarkoaga, Bolueta, La Peña, Peñaskal, Altamira, Zorroza, Arangoiti, Bilbao La Vieja eta Zabala daude.