uriola.eus

"Batek zein bestek gobernatu, pentsioak defendatu"

  Ekonomia-Lana  Bilbo

Urtarrilaren 30eko greba orokorrari babesa adierazi diotela berretsi dute pentsiodunek astearte goizean udaletxe aurrean emandako prentsaurrekoan. Halaber urtarrilaren 29an, mobilizazio orokorraren bezperan, gaueko 21:00etatik 21:15etara herri eta hiri guztietan kazerolada eta burrunba egiteko deialdia zabaldu dute.

"Batek zein bestek gobernatu, pentsioak defendatu"
Irudia: Ecuador Etxea | Ikusi handiago | Argazki originala

Bilbon, Donostian, Iruñean eta Gasteizen manifestazioak eguerdiko 12:00etan abiatuko dira, herri eta eskualdeetan ordea arratsaldean izango dira.

Gehiengo sindikalak eta Euskal Herriko Eragile Sozial gehienek deitutako 30eko mobilizazio orokorra egiteko arrazoiak bi urtetan zehar "gure mobilizazioak zutik mantendu dituzten arrazoi berberak" direla argitu dute pentsiodunek.

Hortaz, gogora ekarri dute egindako aldarrikapenak behin eta berriro aurkeztu izan dizkietela Euskal Autonomia Erkidegoko zein Nafarroako Talde Parlamentariei, baita Kongresuko taldeei ere; baina nahiz eta talde politiko gehienek eskaerak onartu, hauek gauzatzeko aukera izan dutenek ez dute "inongo aurrerapausorik eman". "Hitzez eta aitzakiaz gogaituta gaude. Ekintzak nahi ditugu" adierazi dute. 

Horrenbestez, Greba Orokorrari babesa bermatu eta urtarrilaren 29 zein 30eko deialdiekin bat egiteko gonbitea luzatu dute pentsio publiko eta duin batzuen alde. 

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa