uriola.eus

Bilboko Langile Autodefentsa Sarea: "Langile klasea sistematikoki erasotua izaten ari da"

  Ekonomia-Lana  Bilbo

Azaroa amaieran Bilboko LASek Uribarriko enpresa baten aurka abiatutako lan gatazkaren ondorioz, sei militante atxilotu zituen Polizia Nazionalak otsailean. Orain Langile borrokari errepresiorik ez, korapiloa askatu kanpaina abiatu dute, "errepresioaren aurrean borrokatu eta klase elkartasuna antolatzeko". 

Uribarriko Limpiezas Arana - Fernandez Aguilar enpresaren aurka langile batek egindako salaketaren harira, Bilboko Langile Autodefentsa Sareak lan gatazka abiatu zuen azaroa amaieran. LASen arabera, enpresa honek erdi-esklabutza egoeran mantentzen ditu hainbat emakume langile, "kontraturik gabe eta babesgabetasun egoeran". 

Lan gatazka abiatu eta denbora gutxira, jabeak LASen aurka jarritako salaketaren harira, estortsio jarraitua egotzita sei militante atxilotu zituen Espainiako poliziak, kaltetutako langilea barne. Langile klaseari egindako eraso baten aurrean aurkitzen direla salatu du sareak, "hainbeste gehiegikeriaren aurrean ezetz esan eta sistema honen baitan isolatuak eta baztertuak aurkitzen diren hoiekiko elkartasun erantzunak antolatzeagatik jasotako erasoa".

Joan den ostiralean abian jarritako kanpainak errepresio hori ikustera ematea du helburu, baita langile klasearen sektore ezberdinen arteko elkartasuna bultzatzea. Horretarako, hainbat eragile politiko, antolakunde eta sindikatu bat egin dute kanpainarekin, eta Bilbo zein Euskal Herritik atxikipen gehiago jasotzeko asmoz, korapiloa askatu izena duen webgunean argitaratutako manifestura atxikimendua adierazteko aukera zabaldu dute. 

Sakatu hemen manifestua irakurtzeko

Epaiketa

Otsailean atxilotutako 6 kideak deklaratzera deituak daude ostegun honetan, apirilak 15 eguerdiko 12:00etan. Haiei babesa emateko kontzentrazioa deitu du Bilboko Langile Autodefentsa Sareak Buenos Aires kaleko epaitegietan. 

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa