uriola.eus

Argindar enpresa handien kontra mobilizatuko dira gaur Bilboko auzoetan

  Ekonomia-Lana  Bilbo

Argindarraren prezioaren etengabeko gorakadaren aurka, gaur arratsaldean elkarretaratze ezberdinak deitu dituzte Bilboko auzo ezberdinetan "deskonektatu Bilbo" lelopean. Gaueko 22:00etatik 22:30etara itzalaldi elektriko masiboa egiteko deialdia zabaldu dute. 

'Enpresa elektriko handien xantaiari ezetz' esango diete gaur Deustun, Errekalden, Alde Zaharrean, Bilbo Zaharrean, Castañosen, Uribarrin, Indautxun, Otxarkoagan eta Santutxun. 

Etengabe garestitzen ari da argindarra azken aste hauetan. Irailean megawatt-orduak 150 euroen langa igaro zuen eta joan den asteazkenean berriz, megawatt-orduaren prezioa 228 eurotan kokatu zen. Etenik gabeko igoera honen aurka "deskonektatu elektriketatik" lelopean argindar enpresa handietatik deskonektatzeko deialdia eta manifestua zabaldu dute hainbat eragilek "oligopolio elektrikoak gelditzea herritarron esku" dagoelako. Argindarraren prezioaren igoera salatzeaz gain, Espainiako Estatuko alderdi nagusiek egoera honekiko duten "konplizitatea" ere salatzen da manifestuan. 

Horiek horrela, gaur 11:30ean mobilizazioa egin dute Iberdrola dorrearen aurrean eta arratsaldean, itzalaldi eta kazola jotze masiboaz gain, kontzentrazio ezberdinak antolatu dira Bilboko auzo ezberdinetan. 

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa