uriola.eus

Erailketa matxista salatuz hasi behar izan dute urtea

  Jendartea  Bilbo

Tuterako gertakaria gaitzesteko eta egunerokoan emakumeek pairatzen duten indarkeria behin betiko buka dadin eskatzeko batu ziren atzo iluntzean hainbat herritar Arriaga plazan, Euskal Herriko Mundu Martxak halako erasoei erantzuteko abian jarri ohi duen protokoloari jarraikiz.

Jarraian, Tuterako gertakariaren harira Euskal Herriko Mundu Martxak plazaratu zuen manifestua, atzo iluntzeko elkarretaratzean irakurri zutena:

"Aurtengo urtea, 2022a ere, ez da urte erraza izango. Urtarrilaren lehen hamabostaldia oraindik pasatu ez, eta dagoeneko lehenengo erailketa matxistaren berri izan dugu. Tuteran gertatu da, Sara Yaregi zuen izena, eta Cortesekoa zen, garbi dago emakumeen aurkako indarkeriak ez duela etenik.

Feministok behin eta berriro esango dugu, estrukturala den arazo baten aurrean gaudela. Gizarte osoaren arazoa den hau, emakumeon gorputzetan gorpuzten da. Nazkatuta gaude behin eta berriz berdina oihukatzeaz, ez gara isilduko.

Berriz ere baliabideak eskatuko ditugu instituzio publikoetan, eraldaketa soziala lortu nahi badugu, alderdi ezberdinetatik lan egin behar dugu denok batera. Gizarteak aldaketa beharra dauka, eta jarrera matxistak eta sexistak behingoz amaitu behar dira.

Lehenengo eta behin, osasungintza, hezkuntza, eta justizia publiko eta unibertsal bat behar dugu, izan ere babestu behar gaituztenen joko- arauak berriro porrot egin du. Zerbitzu publiko osasuntsuak eta biolentziarik gabeko espazio seguruak behar ditugu, pairatzen dugun biolentziak erreproduzitzen jarrai ez dezan. Gizarte sozial moduan gure espazioetan eraldaketa bultzatu behar dugu, erasoak salatu behar ditugu, espazio seguruak bermatu behar ditugu, ekimen desberdinak bultzatu behar ditugu...guzti honetarako indarrak batu, eta eraldaketa bultzatu behar dugu.

Denon artean lortuko dugu. Borroka hau geldiezina da, eta feministok beti izango dugu indarra eta ausardia aurrera egiteko, izan direnengatik eta izango direnengatik. Feministok gizarte hobeago batean sinisten dugulako - arrazakeria, biolentzia eta gorrotorik gabekoa-, denok bizitza duin bat nahi dugulako, eta horretarako eskubidea aldarrikatzen dugulako…

GORA BORROKA FEMINISTA!"

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa