Gaua kalean igaro dute harrera duina eskatzeko asmoz

Ongi Etorri Errefuxiatuak taldeak deituta, Euskal Herriko beste zenbait hiri eta herritan bezala, Bilbon ere gaueko kontzentrazioa egin dute. Horren aurretik, lau geldialdi izan dituen manifestazioa egin dute bezperan. Lehenengoa Abandon izan da, erdigunean ikusgarritasuna aldarrikatzeko; bigarrena, La Caixa banketxean, zailtasun burokratikoak gaitzesteko; hirugarrena, Atzerritarren Bulegoan, atzerritartasun legea arbuiatu eta erregularizazioa eskatzeko; eta azkena, itsasadarraren alboan, iraganbide ez-seguruak salatzeko.

Amaitzeko, udaletxearen aurrean bildu dira manifestariak, eta bertan, komunikatua irakurri ostean, mikrofonoen bidez hainbat migratzailek bizi izandako esperientziak partekatu dituzte. Amaitzeko, taldea Areatzako tingladuetara abiatu da, eta bertan igaro dute gaua, kartoien gainean lo egin dutelarik.

(Argazkiak: Ongi Etorri Errefuxiatuak Bizkaia)