Taldea ACBko lidertzaren bila zebilen Bartzelonaren aurka, Real Madrilek Breoganen kantxan galdu ostean. Baina Ludde Hakanson, Francis Alonso eta Jeff Withey jokalarien lesioak direla eta, seinale guztiak beltzezko gizonen kontrakoak ziren. Jaume Ponsarnauk harrobiko Unai Barandalla eta Iker Chacon gazteengana jo behar izan zuen deialdia osatzeko, baina talde harro baten kasta atera zen taula gainera, erraldoi bat garaitzeko aukera aprobetxatu baitzuen.
Garaipen entzutetsuaren protagonistetako bat Alex Reyes izan zen. Jaurtitzaileak distantzia luzetik bere arratsalderik onena izan ez zuen arren, defentsa lanekin bat egin eta bost erreboterekin bukatu zuen partida, Bartzelona bezalako aurkari fisiko baten aurkako harrapakin bikainarekin. «Subidoi bat izan zen, zerbait gorena. Infernutik zerura minutu batean. Uste nuen Abrinesen hirukoa barruan zegoela, indarrez eta norabidez ondo zihoalako, eta bospasei sartu nituelako partidan», adierazi du Reyesek Miribillako balentriatik ordu batzuetara.
Beltzezko gizonek Fuenlabradaren aurka jokatuko dute larunbatean, 18:00etatik aurrera, Fernando Martin pabilioian. Talde madrildarra Endesa Ligako azken postuan dago, denboraldiaren hasieran aspaldian lortutako hiru garaipenekin.