LAB, CCOO, UGT, ESK, STEILAS, CGT, Etxalde, EHNE-Nafarroa, Solidari eta HIRU sindikatuek biharko deitutako lanuzte orokorrak jarraipen handia izango duela aurreikusi dute. Nahiz eta Gazan adostutako su-etenak Palestinako biztanleriaren egoera arindu duen, deialdia egin dutenek nabarmendu dute oso garrantzitsua dela Israeli presioa egiten jarraitzea Palestinan genozidioa, okupazioa eta kolonizazioa behin betiko bertan behera uzteko eta herri palestinarrak askatasunean bizitzeko duen eskubidea bermatzeko.
Lanuztearen erreferentziazko ordutegia 11:00etatik 14:00etara izango da, eta 15:00ak arte luzatuko da ordu horretan lanaldia amaitzen duten jardueretan. Gaueko txandan 03:00etatik 06:00etara egingo da geldialdia, eta arratsaldekoan 19:00etatik 22:00etara. Goizeko 12:30ean manifestazioak egingo dira lau hiriburuetan, Bilbon Jesusen Bihotzetik izango da eta zutabeak antolatu dira auzo eta poligono desberdinetatik abiatuta. Ordezkari sindikalez gain, komunitate palestinarreko ordezkaritza bat joango da eta azken ekitaldian parte hartuko du.
Enpresa bakoitzeko ordezkaritza sindikalak lanuztearekin bat egiteko eskatu die langileei, eta dozenaka mobilizazio antolatu dira Mercedes, Volkswagen Nafarroa, Michelin Gasteiz eta Lasarte, Laminaciones Arregi, Sidenor Basauri, Arteche, Aludium, Gestamp, ZIV, CAF Zamudio eta Acciona Irunberri enpresetan. Plantillari lanuztearekin bat egiteari buruz galdetu ohi dioten enpresetako bozketen emaitzek gehiengoaren babesa islatzen dute, % 70etik gorakoa kasu batzuetan.
Zerbitzu publikoetan, abusuzko gutxieneko zerbitzuak ezarri dira, gure ustez, inpugnatu egin ditugu, eta ebazpenaren zain gaude. Horrela, lanuzteak eta mobilizazioak aurreikusten dira Eusko Jaurlaritzan, Nafarroako Gobernuan, Osakidetzan, Osasunbidean, EiTBn, Guggenheim Museoan, Portu Agintaritzan, justizia administrazioan, hiru aldundietan eta udal nagusietan. Kasu horietan guztietan, azpikontratetako langileek parte hartuko dutela iragarri dute. Garraio publikoan, hezkuntza publikoan eta ikastoletan jarduera gutxieneko zerbitzuetara mugatzea aurreikusten da, eta eskoletako dozenaka jantoki itxiko dira.
19:30ean Gernika-Palestinak mobilizazio deszentralizatuak antolatu ditu udalerri bakoitzean. Bilbon Eliptika plazan izango da arratsaldeko 19:30ean. Lanuzte eta mobilizazio eguneko aldarrikapenak honako hauek dira:
- Langile klase osoak Palestinako herriarekin duen elkartasuna adieraztea. AEBko Gobernuaren laguntzarekin Israel herri palestinarraren aurka egiten ari den genozidioa eta gizateriaren aurkako krimenak salatzea.
- Palestinako lurraldea Zisjordanian etengabe kolonizatzen ari direla eta horrek Palestinako langileen lan- eta bizi-baldintzetan dituen ondorio larriak salatzea.
- Gazako genozidioaren berehalako amaiera aldarrikatzea eta Palestinaren okupazioarekin eta kolonizazioarekin amaituko duen eta herri palestinarrak askatasunean bizitzeko duen eskubidea bermatuko duen konponbide integral bat eskatzea.
- Patronalari eta bertako zein nazioarteko erakundeei eskatzea eten dezatela Israelgo Estatuarekiko merkataritza-harreman oro. Ezin da negozioa egiten jarraitu genozidio baten kontura.
- Europar Batasunaren eta Israelen arteko Elkartze Akordioa bere osotasunean etetea.
