Bilboko Udalak Bilbao Kirolaken aplikazio berria atera du, Bilbao Kirolak orain errazagoa hobetzeko eta hiriko auzo guztietako herritarrentzat irisgarriago egiteko. Tresna berria jada eskuragarri dago herritar guztientzat, bai IOS bai Android duten gailu elektronikoetan, eta Bilbao Kirolaken webgunean.
Aplikazio berria Bilbao Kirolaken webgunearen bulego birtualaren bilakaera eta optimizazio bat da, herritarrei eskaintzen zaizkien produktu eta zerbitzu guztien kudeaketa integrala ahalbidetuko duena, hala nola abonuak, ikastaroak eta jarduerak, kirol-instalazioen erreserbak, sarreren eta bonuen erosketa...
Horrela, erabiltzaileek QR kode bat izango dute hasiera-pantailan, txartel edo eskumuturrekorik gabe instalazioetara sartu ahal izateko; familiako abonuen kasuan, familia-unitateko kide guztiei emango zaie.
Pantaila nagusian begiratu azkar batean kontsultatu ahal izango dituzte une horretan aktibo dituzten ikastaro, kirol-saio edo instalazio-erreserba guztiak. Push jakinarazpenei esker, denbora errealean jasoko dute zerbitzuan edo instalazioetan gertatzen den edozein gorabehera.
Gainera, APPa deskargatzen duten Bilbao Kirolaken erabiltzaileek faktura guztiak kontsultatu ahal izango dituzte, edo instalazio eta jarduera gogokoenak aukeratu, haiei buruzko informazio eguneratua eskuratzeko.
Hobekuntza azpimarragarriak
Bilbao Kirolaken erabiltzaileentzako aplikazio berriaren beste hobekuntza azpimarragarri batzuk honako alderdi hauetan oinarritzen dira:
- Eskainitako ikastaro eta jardueren itxaron-zerrenden kudeaketa automatizatzea. Itxaron-zerrendetan izena eman duten pertsonek jakinarazpen bat jasoko dute plaza bat libre dagoelako abisuarekin, eta 48 ordu izango dituzte ikastaroko alta kudeatzeko, aplikazioaren euskarrien bidez.
- Abonu-aldaketak, banku-kontuen zenbakiak eta bestelako administrazio-izapideak egitea, kiroldegira joan beharrik gabe. Horretarako, PDF editagarriak aurkituko dituzte aplikazioan bertan.
- Datu pertsonalak erraz editatu eta aldatzeko aukera.
- Entitatearen produktuak eta zerbitzuak erabiltzeko eta gozatzeko eskatzen den dokumentazio guztia eranstea eta bidaltzea, eta nork bere gailuetan egiaztatu ahal izatea Bilbao Kirolakek balidatu dituela.
- Gainera, familia-abonuak dituzten pertsonek edozein izapide mota egin ahal izango dute (altak ikastaroetan, pisten erreserbak, etab.) abonuari lotutako edozein kiderentzat, familia-unitateko erabiltzaile bakoitzak bere burua identifikatu beharrik gabe.