uriola.eus

Errekaldeko herri mugimenduaren aurkako "errepresioa eta jazarpena" salatu dute

 Errekalde

Jai Batzordea osatzen duten Errekaldeko kirol, kultur eta gizarte taldeek "auzoko herri mugimenduaren aurkako errepresioa eta jazarpena" salatu dute "berriro ere". Etxarri gaztetxearen "desalojo berri honek", azpiegiturei dagokienez, Errekalde auzoko herri mugimenduaren "prekarietatea" agerian uzten duela adierazi dute ohar baten bidez.

Jai Batzordekideak "autogestioan sinestu" eta "berau babestu eta defendatzen" duela diote taldekideek, "hori baita gure funtzionamendu eredua, eta hori ere bada Etxarri gaztetxearena".

Errekaldeko Jai Batzordeko taldeak "bigarren aldiz" jarduerak antolatzeko material barik geratu dira  atzo goizean Etxarri gaztetxearen hutsaraztean Udaltzaingoak eta Ertzaintzak Errekatartalo erraldoia (jaietako ikurra), musika ekipoa, susko zezena... eraman zituztelako. 

Oharraren amaieran, Etxarri gaztetxeko kideei elkartasuna helarazi diete: "Ozenki adierazi oraingoan ere Udala, PNV buru, Kukutzako desalojoan egin zuen bezala gezurretan ari dela".

Gazteleku, Onki Xin elkartea, Eskaut, Arraizpe dantza taldea, Zohardia elkartea, Txoriak elkartea, Euskarri elkartea, Etxarri Gaztetxea, S.D. Iturrigorri eta Irrikalde elkarteak osatzen dute Errekaldeko Jai Batzordea.

 

[2016-11-30] Ertzaintzak Errekaldeko Etxarri gaztetxea utzarazi du

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa