Musikari ezagunek hartu dute parte abestian. Xabier Zabala da musikaren egilea, Pirritx, Porrotx eta Marimototsen ohiko kolaboratzailea. Interpretazioan, aldiz, hainbat abeslari eta musikarik hartu dute parte: Izaro abeslari gaztea, Petti beratarra, Miren Narbaiza Napoka Iria eta beste hainbat proiektutako kantaria, Jurgi Ekiza Willis Drummond taldeko abeslaria eta Oihana Fernandez Afu Iruñeko musika-taldeko abeslaria. Jarauta 69 txarangako kideek jarri diote musika, Oreka TXeko kideekin elkarlanean. Doinu balkanikoak gogora dakartzan abestia osatu dute, bizia eta alaia.
Otxandion hasi eta Iruñean bukatu bitartean, 20. Korrikako furgonetako bozgorailuetatik gehien entzungo den abestia izango da Zirkorrika abestia. Gaur aurkeztu dute AEK eta Korrikako arduradunek kantuaren egile eta interpreteetako batzurekin batera.