Ordurarte enpresak ez zien eman prozesuaren berri langileei; grebari eusteko erabakiak, ordea, egoera aldatu zuen; zuzendaritzak bere burua behartuta ikusi zuen grebalariekin harremanetan jarrri eta egoera zein den azaltzera. EEEa hasi zenetik lehenengoz egin zuen hori.
Gaurkoz hau da egoera: EEEak gurean 37 laguni eragiten die (33 langileri Bizkaian eta 4ri Gipuzkoan); epea ireki da nahi duenak borondatez enpresa uzteko izena eman dezan, lan egindako urteko 33 eguneko kalteordainarekin (gehienez 24 hilabete). Borondatez aurkezten direnen kopuruak beste hainbeste kaleratze murriztuko luke.
Grebalariek aho batez onartu dute ELAren proposamen hau:
- Greba mugagabea positiboa izan da. Hemengo langileak izan dira beren lanpostuen alde borrokatu diren bakarrak, eta horregatik EEEak eragin txikiena berton izango du: Hasierako 71 langile kaleratu ordez orain 37 aipatzen dira.
- Madrilen Fetico eta UGTk akordioa sinatu ondoren greban jarraitzeak enpresa behartu egin du egoeraren berri ematera, eta dendetan dauden langile beharrizanen inguruko prozesuari ekitera.
- Ez dugu etsiko kaleratze traumatikoak zero izan arte. Horregatik, greba mugagabea utzi baina beste lanuzte aldi bat hasiko dugu.
Grebaren aldi berriari buruzko erabakiak:
- Honez gero 37 kaleratze izango direla esaten bada eta pertsona batzuk borondatez joateko prest badaude, dendetan enplegu beharrizana nahikoa litzateke inor nahi ez duela ez kaleratzeko. Dendetan izan daitezkeen beharrak proposatuko ditugu, jende hori birkokatzeko.
- Mugagabeko greba bertan behera uztea.
- Mobilizazioari eustea, apirilean hiru greba egun eginez.