uriola.eus

Bizkaitar bat Munduko Futbol Txapelketan

Gaur Errusian hasi da Munduko Futbol Txapelketa. Bertan, jokalari bizkaitar bat egongo da aspaldiko partez, eta, azkenengo hogei urtetan gertatu den bezala, ez dugu jokalari bilbotarrik izango.

Rafa Alkorta izan zen deitu zuten azkena. 1998an Frantzian antolatu zen txapelketan jokatu zuen eta ordutik, Bizkaiko hiriburuak ez du ordezkaririk izan. Errusia da bostgarren lehiaketa segidan, Korea eta Japoniakoa, Alemaniakoa, Hegoafrikakoa eta Brasilgoaren ostean. 

20 urte izango dira guztira, bost mundial, Bilbok kalitate handiko jokalaririk eman gabe. Gutxienez, Bizkaiko ordezkari bat egongo da aurten zelairatzeko prest. Kepa Arrizabalagak, Ondarroako atezain gazteak, Lopetegiren zerrendan sartzea lortu du, Gaizka Mendietaren lekukoa hartuz.

Gogoratu behar da Lekeitioko erdilaria izan zela azkenengo bizkaitarra Munduko Futbol Txapelketa batean. Italiako Lazio taldean jokatzen ari zenean Camacho entrenatzaileak deitu zion Korea eta Japonian antolatu zen txapelketan parte hartzeko. Bere aurretik, ordea, hainbat jokalarik parte hartu zuten mundu mailako ikuskizunean.

Espainiako futbol selekzioa abiatu zenetik, 96 bizkaitarrek izan dute elastiko gorriarekin lehiatzeko aukera. Hori bai, gauza jakina da ez dela berdina partida bat jokatzea eta mundialeko zerrendan egotea, lau urteetan behin munduko onenekin buruz-buruz lehiatzea nekez lortzen baita. 

Lehen aipatu dugun bezala, helburu hori lortu zuen azkenengo bilbotarra Rafa Alkorta izan zen. Bilboko atzelariak hiru mundialetan parte hartu zuen, guztiak hamarkada berdinean: Italia 90, USA 94 eta Frantzia 98, eta Julio Salinasen marka parekatu zuen. San Adriangoak, Italia 90an eta USA 94an egoteaz gain, Mexikoko Mundu Txapelketa jokatu zuen 1986an. 

Italian antolatu zen txapelketa aipagarria da, orduan hiru jokalari bilbotar aritu zirelako. Leku berean debuta egin zuten Ramon Lafuentek eta Leonardo Zilaurren bilbotarrek 1934an, jokatu zen bigarren Munduko Kopan. Etxeko taldeak kanporatu zuen Espainiako Errepublika ordezkatzen zuen taldean. Final-laurdenetan gertatu zen, desberdintzeko norgehiagokan, eta Italiako jokalariei, txapelketa osoan bezala, joko zikina leporatu zieten. Zilaurrenek Arenasetik Athleticera salto egin zuen Italiatik bueltatu ostean. Futbolari bilbotarrak erbesterako bidea hartu zuen Gerra Zibilaren ostean eta Argentinako River Platen, Uruguayko Peñarolen eta Mexikako ligan aritu zen.

Bilbotarren zerrenda amaitu aurretik, Jesus Garai jokalaria gogoratu behar dugu. Bilbotarrak Chile 1962n parte hartu zuen. Bitxikeria bezala, Athleticek Barcelonari saldu zionean, harmaila berria eraki zuen San Mamesen, Garai harmaila zeritzona. 

Arestian aipatu bezala, jokalari bizkaitar bat arituko da aurten Munduko Futbol Txapelketan. 16 urteren ostean, Espainiako selekzioari futbolari gehien eman dion probintziak ondarrutar bat sartu du Lopetegiren deialdian. Guztira, 96 bizkaitar aritu dira elastiko gorriarekin eta ia laurden batek gaur Errusian hasiko den bezalako lehiaketa batean parte-hartzeko aukera izan duen. Ea nor den hurrengoa. 

Munduko txapelketan egon diren jokalari bizkaitarren zerrenda osoa: 

2018: Kepa Arrizabalaga

2002: Gaizka Mendieta

1998: Julen Guerrero, Rafael Alkorta eta Julio Salinas

1994: Julen Guerrero, Rafael Alkorta eta Julio Salinas

1990: Rafael Alkorta, Genar Andrinua eta Julio Salinas

1986: Andoni Goikoetxea eta Julio Salinas

1982: Jose Alexanko eta Santiago Urkiaga

1978: Daniel Ruiz Bazan

1962: Jesus Garai, Carmelo Cedrun eta Luis Mari Etxeberria

1950: Piru Gainza, Jose Luis Panizo eta Telmo Zarraonaindia

1934: Jose Iraragorri, Guillermo Gorostiza, Simon Lekue, Ramon Lafuente eta Leonardo Zilaurren

 

Iker Elorriaga eta Jon Intxaurraga

 

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa