Gazteek sormenerako duten gaitasuna eta ilusioa ikusteko aukera paregabea izan zen Barrutik Kanpora ikuskizuna, Bilboko Campos Antzokian. Udalak eta Euskaltzaleen Topaguneak urtero antolatzen duten Harrapazank programaren barruan, orain modan dauden talent show direlakoen antzeko lehiaketa egiten dute, 12 eta 18 urte bitarteko gazteak euskarazko aisialdira erakartzeko. Camposeko oholtzan batu ziren aurtengo edizioko onenak.