Istiluak eta sei atxilotu Bilbon, pandemiari aurre egiteko gobernuen neurrien aurkako protestan

Erabiltzailearen aurpegia Argia 2020ko urr. 30a, 10:35
Ertzaintzaren atxiloketa bat. Irudia: @KonsoOrganicLau

Protesta egin dute ostegun gauean Bilboko Indautxu auzoan, COVID-19aren zabalpena geldiarazteko gobernuek ezarritako neurri murriztaileen aurka. Protestaren ostean istiluak sortu dira, hogei bat edukiontzi erre dituzte eta sei lagun atxilotu ditu Ertzaintzak.

Sei pertsona atxilotu dituzte bart Bilboko erdigunean, etxeratze-aginduaren eta COVID-19aren hedapena geldiarazteko gobernuek hartutako neurrien aurkako protesta batean. Sare sozialen bitartez zabaldu da ekimena, eta ez da deitzaile jakinik. Europa Press berri agentziak zabaldu duenez, 200 edo 300 bat pertsonak hartu dute parte protestan. Manifestariek "errepresioa" eta etxeratze-aginduaren aurkako kartelak eraman dituzte.

 

Ertzaintzak jakitera eman duenez, elkarretaratzea Indautxuko plazan hasi da, 21:30ak aldera, eta istiluen aurkako agenteek esku hartu dute manifestarien aurka. Ertzaintzaren bertsioaren arabera, botilak, harriak eta petardoak jaurti dituztelako. Istiluak Indautxuko plazatik Kale Nagusira eta Ercilla eta Henao kaleetara zabaldu dira, eta ibilbide horretan, su eman diete hogei bat edukiontziri.

Segurtasun Sailak adierazi duenez, autoritateari eraso egitea eta segurtasun neurriak ez betetzea leporatu diete sei atxilotuei, baita beste beste hiru pertsonari ere.

 

Gizartea Abando - Indautxu