Otsailean jakinarazi zen emakume batek Bilboko Ormaetxe tabernako nagusiaren aurka salaketa jarri zuela, drogatu eta bortxatu izana leporatuz. Abiatutako salaketa dinamikaren ondotik, auzoko mugimendu feministak errepresioa jasan du: gutxienez 20 pertsona identifikatu dituzte, eta 2.500 euroko zigor bana jaso dute bi pertsonak. Isun horiek Bilboko Udaltzaingoaren gezurretan oinarrituta daudela defendatuz, epaitegietara jo du mugimendu feministak; urtarrilaren 10ean dute epaiketa.