Club boteretsuak, bai, baina ez guztiz ezezagunak Athleticzaleontzat. Izan ere, azken hiru urteetan zortzi talde horietatik seiren kontra jokatu baitu Athleticek Espainiako Liga nahiz Europa Leagueko txapelketetan. Eta datorren denboraldian oso litekeena da euretako batzuen aurka ere nor baino nor ibiltzea talde zurigorria, non eta Champions Leaguen!. Horretarako, laugarren postuari eutsi ez ezik sailkatze kanporaketa bat gainditu ere egin beharko dugu abuztura bitartean.
Eman dezagun lortzen dugula, meritu handiko balentria litzateke eginikoa, bai, dudarik gabe, baina, bizitzaren beste arlo batzuetan modura, zer baino zelan eskuratu den garrantzitsuagoa izaten da. Erromara bide guztiak heltzen omen baziren, San Mamesetik Europara doazen guztiak Lezamatik pasatzen dira. Ligan 31 jardunaldi jokatu diren honetan, Txingurri Valderdek zelairatu duen hamaikakoan Lezamatik irtendako jokalarien bataz bestekoa ia 9koa izan da. 31 partidu horietan parte hartu duten ordezkoenari ere begiratzen badiogu, 3 aldaketatik 2 Lezamako jokalariek bete dutela jabetuko gara. 14tik 11 dira Lezamak sortu dituen jokalariak guztira. Hauxe da Athleticek egiten duen ekarpena, izarrez beteriko futbol izeneko planetan bestelako izarrak ere ezinbestekoak direlako. Bai, Lezama maite, atzo goizean ikusi zintudan…