Ez zen jendetzarik bildu atzo arratsaldean Santutxuko Garoa txokoan, baina bertaratu zen dozenako taldeak Arrigorriagako lehen kanporaketan baino saio sendoagoa entzuteko aukera izan zuen.
Bertsolariek aski bat-batean eta sarritan aurrekoaren ildoari eutsiz kantatu zuten. Ale gozagarriak utzi zituzten Urtzi Urrutikoetxeak manera txukunean jarritako gai anitzei erantzutean. Kaleren bat edo beste ere izan zen.
Joseba Barandiaranek irabazi zuen atzoko kanporaketa. 195 puntu eskuratu zituen eta maiatzaren 3ko finalerako txartela. Bere ostean geratu ziren Txaber Ormazabal (185 puntu) eta Axier Goñi (178,5 puntu) ere sailkatu dira finalerako. Kanpoan geratu dira Irati Erkizia (176 puntu), Mikel Galartza (171 puntu) eta Peio Molinuevo (156,5 puntu).
Iritzia: Potojorran bertso-eskola Santutxuko "Garoa" txokoko aroa
Iritzia: Joseba Barandiaran Bertsolari txapelketa finalera begira
Bilbokaldeko finala
Maiatzaren 3an, Hika Ateneoan (17:30) jokatuko den Bilboaldeko finaleko bertsolariak erabakita geratu dira. Hurrengo hauek dira:
- Oihana Bartra Arenas
- Peio Ormazabal Villanueva
- Joseba Barandiaran Andueza
- Txaber Ormazabal Villanueva
- Arkaitz Zipitria Mendizabal
- Axier Goñi Arsuaga
Bizkaiko Bertsolari Txapelketa 2014
Abendurainoko ibilbidea edukiko du, baina daborduko hasi da martxan Bizkaiko Txapelketa. Lehenengo fasean, Eskualdeetako Bertsolari Txapelketak jokatuko dira, eskualdez eskualde, bakoitzean txapeldun bana izendatu arte. Denera zortzi eskualdek osatzen dute Bizkaiko mapa.
Maiatzean jokatuko dira final denak. Baina finaletara heldu orduko, eskualdeetako kanporaketak jokatuko dira, tokian tokikoak.
Hurrengo kanporaketa guztiak udabarriko oporren ostean jokatuko dira, maiatzeko eskualdeetako finaletara heldu arte.