Madrileko Bioelektromagnetismo Laborategiko zuzendari da Ceferino Maestu Unturbe. Bihotzean auzo elkarteak eta Errondagane guraso elkarteak gonbidatuta emango du hitzaldia Bilbon gaur. Solokoetxeko igogailuan kokatuta dauden antenen erradiazioa jasaten duten "ikastetxe eta auzoaren defentsan", hitzaldian parte hartu eta "informatzeko" gonbidapena luzatu diete auzotarrei.
Europako Kontseiluak 1815 Ebazpenean gomendatzen dituen erradiazio elektromagnetikoaren gehienezko mailekin, 0,1uw/zm2 kanpoaldean eta 0,01uw/zm2 barrukaldean, hau da, ardura printzipioarekin, bat egin zuen Eusko Legebiltzarrak. Solokoetxe BHIko ikasleriak eta auzokideek "ehunka bider altuagoak" diren maila jasatzen dutela salatu dute elkarteek behin eta berriro. "Gutxienezko neurri hori" ikastetxean aplikatzea eskatu dute eta, bitartean, zentroko ikasle zein irakasleak babesteko "pantailak jartzea".
Elkarteek salatu dutenez, Hezkuntza Sailak "ez du 23.000 euro gastatu nahi" neurri hoiek jartzen eta bitartean "gure seme-alabak erradiazio maila altu hori jasatzen ari dira ikastetxean daudenean".
Errondagane guraso elkarteak joan den irailaren 25ean konbokatutako “protesta egunean” 177 familiak (235tetik) ez zituzten beren seme-alabak klasera bidali "bizi duten egoera" salatzeko. "Bitartean instituzio publikoek operadoreen interesen alde egitea erabaki dute", gurasoen aburuz.
Hitzaldia: Telefonia mugikorreko antenek sortutako erradiazio elektromagnetikoak eta osasunean duten eragina
Hizlaria: Ceferino Maestu Unturbe, Madrileko Bioelektromagnetismo Laborategiko zuzendaria
Hitzordua: urriak 28 asteartea, La Bolsa udaltegia, 19:00
[2014/09/03] Solokoetxeko ikasleak ostegunean ez dira klasera joango antenen erradiazioa salatzeko
[2014/06/18] Beste aste batez Solokoetxeko antenak kentzea galdegingo dute gaur arratsaldean
[2014/06/11] "Antenarik ez, 0,1 ya" lelopean elkarretaratzea egingo dute Solokoetxeko auzotarrek
[2014/06/05] "Antenarik ez, 0,1 ya" lelopean beste elkarretaratze bat