"Udalbatzaren gehiengoa merkatal-ordutegiaren liberalizazioaren aldekoa da", sindikatuen iritziz. "Ohiko jarrera" horri aurre egiteko deitu dute bihar 11:00etan egitekoak diren elkarretaratzea.
Igande eta jaiegunetan dendak zabaltzeko neurriak "ondorio kaltegarriak" ekarriko dituela adierazi dute UGT, CCOO, ELA eta LAB sindikatuek eta, lan eta gizarte ikuspegitik, "gezurretan oinarritzen" den erabakia dela. Ordutegia zabaltzeak ez du kontsumoa indartuko, "kontsumoa egunez eta dendaz aldatzea baino ez du eragingo". Sindikatuen arabera lanpostuak ez dira sortuko, "suntsitu baizik" eta, gainera, merkatal gune handietan "lan prekarioa" sustatuko da.
Arduratuta daude sindikatuak ordutegien liberalizazioak merkataritza bezalako sektorean izango duen eraginagatik. Emakumeak nagusi diren sektorea izaki, "ia ezinezkoa izango da lana eta familia bateratzea igandetan zabalduz gero". Horrelako neurriekin lan eskubideak "urratzen" dira eta langileen osasuna "kaltetzen da".
Sindikatuek biharko protestaldian gogoraraziko dute "ez merkatariek ez kontsumitzaileek" ez dutela ordutegiaren malgutzea eskatu, egun indarrean dagoen ordutegia "behar beste zabala" dela pentsatzen baitute.
[2014/09/03] Ordutegi mugagabea izango dute Bilboko hiru gunek 2015eko uztail-abuztuan
[2014/09/03] EHBilduk EAJri eskatu dio merkatu txikia jazartzeari uzteko
[2014/09/02] LAB: Igande eta jaiegunetan, merkataritzan jai!