Atzo bezala elkarretaratzea burutu dute gaur ere Luis Briñas eskola eta Karmelo Ikastolako atarietan 8:45ean, ikasleak gelara sartu aurretik, 15 minutuz. 'Denok gara 3. maila. Planto azterketa inposatuei' izan da elkarretaratzeetan zabaldu duten mezua.
Txurdinagako Gabriel Aresti institutuan 10:45ean kanta eta dantza eginez adierazi diete ikasle eta irakasleek elkartasuna 3. mailakoei.
Azterketak
Gasteizen atzo hasi ziren 3. mailako azterketak egiten. EAEko gainerako hiriburuetan noiz egingo diren ez du ezagutzera eman Hezkuntza Sailak. "Momentua heltzen denean, ikastetxeekin harremanetan jarriko gara", azaldu du Uriarte sailburuak.
LOMCEk proba orokorrak ezarri ditu Lehen Hezkuntzan, DBHn eta Batxilergoan. Azken biak nahitaez gainditu behar dira titulua eskuratzeko. Lehen Hezkuntzakoa diagnostikoa egiteko da. Uriarte sailburuaren arabera, "gure seme-alabak eta hezkuntza sistema nola garatzen ari den jakiteko probei buruz ari gara".