uriola.eus

Zinegoak jaialdiko egitaraua aurkeztu dute

  Kultura-aisialdia  Bilbo

Zinegoak jaialdiko lantaldeak 15. edizioko nobedade eta ezaugarri nagusiak aurkeztu ditu. Aurtengo jaialdiak ezberdintasunen naturaltasuna aldarrikatuko du eta, horrez gain, sexu-, identitate- eta genero-aniztasuna landuko dute.

Zinegoak jaialdiko egitaraua aurkeztu dute
Aurkezpenaren argazkia | Ikusi handiago | Argazki originala

Zinegoak 2018 otsailaren 19tik martxoaren 4ra arte ospatuko da. Programazioaren alderik indartsuena lehenengo astean izango da (egun horietan izango baita lehiatuko diren pelikula guztien lehenengo paseak). Bigarren astean, ostera, paseak errepikatzeko eta jarduera osagarriak antolatzeko momentua helduko da. Guztira, 135 jarduera eta proiekzio baino gehiago.

Pau Guillen zuzendariak azaldu duen moduan “gure ideia nagusia da ezberdintasunek norbanako egiten gaituztela, eta maitatzeko moduak, gure identitatea adierazteko moduak eta gure sexualitateaz gozatzeko moduak, ezin dutela mugatuta arau sozial edo estetikoengatik”.

Aldarrikapen hori hasieratik egon da presente. Kartelaren ilustrazioa hautatzeko orduan, lanak aukeratzerako orduan, edo Emilie Jouvet zinegileari Ohorezko Saria ematerako orduan. Izan ere, Jouvetek intimitatea eta gorputza borrokarako eta militantziarako tresna bihurtu ditu, zinema eta argazkigintzaren bidez.

Programazioari dagokionez, nabarmendu behar da Estatu mailan egongo diren estreinaldien kopurua: 22 guztira. Horrez gain, Europa mailako hiru estreinaldi eta mundu mailako bi estreinaldi izango ditugu: Nove de Novembro (Lazaro Louzaoren opera prima, galegoz grabatutako lehenengo LGTB pelikula) edo Enfemme (Alba Barbe i Serra zuzendariaren lana, crossdressing munduaren inguruan). 

Baina batez ere azpimarratzekoa da edizio honetan egongo diren gonbidatuen kopurua (20 lan baino gehiagoetako ordezkariak egongo dira). Horrela, publikoak aukera izango du sortzaileekin zuzen-zuzenean hartu-emana izateko.

Horrez gain, jaialdiak bere ohiko atalak izango ditu Laburmetraien arloan (Begiradak), Off atalak izena aldatu eta Narratiba Berriak deituko da, Argitutako Klasiko Ezkutuen zikloa… Bilgunen, gai nagusi bi landuko dira: memoria historikoa (Federico Garcia Lorcaren erailketaren ingurukoa) eta pinkwashing izeneko kontzeptuaren inguruko eztabaida. 

Azkenik, lantaldeak eskerrak eman nahi izan dizkie beste urte batez Zinegoak Hedapenean parte hartu duten udalerri guztiei. “Gero eta interes handiagoa da zinema eta kultura hirigune handietatik kanpo eramateko. Aurten Euskal Herriko 40 udalerritara helduko da, 50 proiekziorekin”, azaldu du Oneka Alvarez, Zinegoak Hedapeneko koordinatzailea.

Horrez gain, otsailaren 14an 3, 2, 1… Zinegoak! hasiko da, hainbat elkarte eta erakunderekin batera: Guggenheim Bilbao Museoa, Pikara Magazine, Sare Lesbianista, Sala BBK eta abar. Azken horretan, Emilie Jouveten Aria lana proiektatuko da. 

 

[2018-01-31] Emilie Jouvet zinemagilearentzat Zinegoak jaialdiaren Ohorezko Saria

[2018-01-26] Zinegoak jaialdiko epaimahaiak aukeratu dituzte

[2018-01-10] Zinegoak jaialdiaren kartela aurkeztu dute

 

Erantzunak

Erabiltzailearen aurpegia Erantzuna | #1

Herri honetako festibal guztietako makur bera dakar Zinegoak-ek: euskaldunak ikusezinak gara, ez dugu zinemaldietara joaterik, espainolez jakin behar da festibalean egoteko. Film guztiak espainolera azpidazten dira, hizkuntza bakarrera, bitara egitea erraza eta merkea izan arren. Bere egunean Sitges-ekoarekin konparatu nuen legez, Bartzelonako azken FICGLBko (Festival Internacional de Cinema Gai i Lèsbic de Barcelona) kartelera begiratu dut, eta han bai, nongura VOSC, jatorrizko bertsioa katalanez azpidatzita. Gero, Bruselako karteldegira jo dut; filmak frantsesez eta nederlanderaz, bi hizkuntzatan azpidatzita arazorik gabe. Erraza eta merkea da, borondatea baino ez da behar. Baina gurean ezberdintasunaren balioa aldarrikatzen da, eta gero uniformizazio elebakarra inposatzen digute, beti espainolez.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa