Justizia eskatzeko eta Iñigo Cabacas gogoratzeko egunak

uriola.eus 2018ko api. 6a, 08:39

'La cifra negra' dokumentalaren estreinaldia atzo Bilborocken (Arg. @etxeandi)

Gomazko pilota baten kolpeak izan zuen hilzorian hainbat egunez Iñigo Cabacas, duela sei urteko apirilaren 9an hil zen arte. Gomazko piloten erabilera debeatzea eta Ertzaintzaren eredu aldaketa eskatzea izan da Iñigoren senide eta lagunen aldarri nagusia 2012tik.

Ertzaintzak egun ez ditu gomazko pilotak debekatu, eta horien erabilerari "bultzada eman nahi die futbolaren aitzakiapean". Iñigo Gogoan herri ekimeneko kide Marta Perezen esanetan, Moskuko Spartak eta Marsellako Olympique taldeetako jarraitzaileekin izan diren istiluak direla eta, "segurtasunerako elementu direlakoan, arrisku bizian jartzen gaituzte hiritarrak".

Ildo horretan, gaur, hilak 6, "gomazko piloten eskaintza herritarra" antolatu dute Cabacasen lagunek Justizia Jauregiaren aurrean, 19:00etan.

Bihar, hilak 7, Iñigo Cabacas Herri Harmailako kideek omenaldia egingo diote gazte basauritararri San Mameseko 13. atean 12:30ean. Ostean, 13:30ean Indautxun, Kirruli plazan, Iñigok pilotakada jaso zuen lekuan izango da urteroko ekitaldia.

Urteurreneko ekitaldiak La cifra negra dokumentalaren estreinaldiarekin eta ondorengo solasaldiarekin hasi ziren atzo Bilborock aretoan. Estatu espainiarreko bortizkeria instituzionala salatzen duen lana da Ales Payak zuzendutakoa eta Empatik Filmsek ekoitzitakoa. Funtzionario publikoek burututako giza eskubideen urraketak azaltzen ditu dokumentalak 30 kasu paradigmatikoren bitartez. Tartean dago Iñigo Cabacasena. Ales Paya zuzendariaren esanetan, "beharrezkoa da gizarte zibila bortizkeria instituzionalaren aurka inplikatzea eta borrokatzea".

Sei urteren ostean

"Zeinek esango zuen sei urtera hemen egongo ginela", adierazi du Marta Perezek Iñigo Cabacasen senide eta lagunen izenean. Izan ere, azken sei urteetan Basauriko gaztearen lagun hurkoen galderak ez dira aldatu: "Arduradunak noiz eseriko dira akusatuen aulkian?" Eta "noiz egingo da justizia?".

"Zuhurtziagabekeria larriko giza hilketa" leporatuta, sei ertzainen aurkako epaiketa urriaren 5etik azaroaren 9ra egitekoa da. Baina Perezen hitzetan, "parodia mingarri bat izateko arriskua dago, operatiboaren arduraduna eta arduradun politikoak ez direlako aulkitxoan eseriko".

Kezka dute Iñigoren senide eta lagunek instrukzioaren prozesu osoan zehar operatiboan parte hartu zuten ertzainek "babes itzela" izan dutelako. Euren esanetan, "mingarriena eta harrigarriena" operazioaren arduradunak, Ugarteko-k, izan duen "babes politiko eta juridiko izugarria" da. Agerraldian, Ugartekoren "azken ekintzari" ere erreferentzia egin diote, "familiaren abokatua eta Naiz eta Gara-ko zuzendaria eta kazetari bat salatzea".

Badira instrukzioaren prozesuan gertatutako irregulartasun gehiago ere adierazi dutenez. "Ikerketaren luzapena, frogak jasotzean egon diren oztopo eta desagerpenak" edota "deliturik ikusten ez duen fiskaltzaren jarrera", esaterako. Guzti horrek "kezka" eragiten diela azpimarratu dute.

[2018-04-05] Sei urte beranduago Iñigo Cabacasen senide eta lagunek minduta jarraitzen dute

[2018-03-26] Iñigo Cabacas hil eta sei urtera, bere senide eta lagunak "jutizia noiz egingo zain" daude

Gizartea